കൊലകൊമ്പന്‍

രാവണഖഡ്ഗം (ഇടവേളയ്ക്കു ശേഷം)

2010-06-05T07:41:00.000-07:00

ദാണ്ടേ ഇടവേളയ്ക്കു മുന്പ് സംഭവിച്ചത് !

ഫൈനലി..... രാവണന്‍ ബാക്ക് സ്റ്റേജിലേയ്ക്ക് വന്നു ..

അഴിഞ്ഞു വീഴാന്‍ പാകത്തിന് ഞൊറി ഒക്കെ വച്ച് ഏച്ചു കെട്ടി ഒരു പട്ടുമുണ്ട് കോണകം പോലെ ഉടുത്തിരിക്കുന്നു.. ശബരിമലയ്ക്ക് പോകുമ്പോള്‍ അണ്ണാച്ചി സ്വാമിമാര്‍ അരയില്‍ കെട്ടുന്ന പോലെയുള്ള ഒരു വലിയ ബെല്‍റ്റാണ് മുണ്ടിനെ താങ്ങി നിര്‍ത്തിയിരിക്കുന്നത്. അതില്‍ ചോദ്യചിഹ്നം പോലെ ഒരു വാളുറയും ഫിറ്റ്‌ ചെയ്തിട്ടുണ്ട് . കാലില്‍ ചുണ്ടന്‍ വള്ളം പോലത്തെ ചെരിപ്പ്.

വെളുത്തു സുന്ദരനായ ആശാനെ കറുത്ത കളര്‍ ഒക്കെ അടിച്ചു വച്ചിരിക്കുന്നത് കണ്ടാല്‍ രാവണന്‍ ഇന്‍ഡോ-ആഫ്രിക്കന്‍ ആണെന്ന് തോന്നിപ്പോകും. മീശ കണ്ടാല്‍ മലര്‍വാടി ബാലമാസികയിലെ പൂച്ചപ്പോലീസിന്റെ മൂത്ത ജ്യേഷ്ഠന്‍ . ഒന്നും പോരാഞ്ഞിട്ട് ഒമ്പത് എക്സ്ട്രാ കാഡ്ബോഡ് തലകള്‍ ഫിറ്റ്‌ ചെയ്ത ഒരു കിരീടവും.. ഇപ്പൊ ആശാനെ കണ്ടാല്‍ ഒറിജിനല്‍ രാവണന്റെ പെറ്റ തള്ള സഹിക്കൂല.അമ്മാതിരി കോലം.. രാവണന്‍ കണ്ടാല്‍ മാനനഷ്ട്ടത്തിനു കേസ് ഉറപ്പ് !

കിരീടം ഊരി വച്ച ആശാന്‍ ഒരു ബീഡി വലിയ്ക്കാന്‍ പുറത്തേയ്ക്ക് വന്നു.. ഉടനെ ഞങ്ങള്‍ ചാടി വീണു..

"ആശാനേ , രാവണന്‍ കലക്കി .. . ല്ലേടാ ? " സുനി ഞങ്ങളെ നോക്കി..

"പിന്നേ, സീതയെ പൊക്കണ ഭാഗം വെറും കിടിലം ! " ഭക്തകുചേല മാത്രം കണ്ടു ശീലിച്ച സുകുവിന്റെ കള്‍ച്ചര്‍ലസ് കമന്റ് കേട്ടു ആശാന്‍ വാ പൊളിച്ചു പോയി..

"ആശാന്‍ മമ്മൂട്ടി തന്നെ , മമ്മൂട്ടി " ഞാനും കുറച്ചില്ല (പടം മൃഗയ എന്ന് മനസ്സിലും പറഞ്ഞു)

പിന്നേം എല്ലാരും കൂടി ആശാന്റെ പേര്‍ഫോമന്‍സിനെ പറ്റി വാതോരാതെ തള്ളിത്തള്ളി പുള്ളിയെ ഉന്തി നിലത്തിടും എന്ന അവസ്ഥയായി.. ആശാന്‍ തന്റെ വയ്പ്പ് മീശ പതുക്കെ ഒന്ന് പിരിക്കാന്‍ ഒരു വിഫലശ്രമവും നടത്തി ! എന്നിട്ട് ഞങ്ങളോട് പറഞ്ഞു ..

"ഹ്ഹോ .. നിങ്ങളെ കണ്ടപ്പോഴാടാ സമാധാനമായത്.. രാവിലെ മുതല്‍ ഇത് വരെ ഒരു തുള്ളി ചാരായം പോലും കുടിച്ചിട്ടില്ല.. വയറു കാളിത്തുടങ്ങി.. ഉച്ചയ്ക്ക് അവന്‍മാര് ചോറിനൊപ്പം സംഭാരം തന്നപ്പോ സങ്കടം കൊണ്ടു കണ്ണ് നിറഞ്ഞു പോയി.. ഓര്‍മ വച്ച നാളു മുതല്‍ ചാരായം ഇല്ലാതെ ഞാന്‍ ചോറുണ്ടിട്ടില്ല".

രാവണാശാന്‍ വികാരാധീനനായി , ഞങ്ങള്‍ ആവേശഭരിതരായി.. ഞങ്ങളുടെ കയ്യില്‍ സാധനം ഉണ്ടാവും എന്ന് ആശാനറിയാം..

"എന്റെ അടുത്ത സീന്‍ അര മണിക്കൂര്‍ കഴിഞ്ഞിട്ടേ ഉള്ളൂ . സാധനം ഉണ്ടെങ്കില്‍ നിങ്ങള്‍ ഒരെണ്ണം ഒഴീര് "

"അയ്യോ ആശാനെ, സാധനം ഉണ്ട് , പക്ഷെ ആശാന്‍ അടിച്ചു കോണ്‍ തിരിഞ്ഞാല്‍ ബാലെ കുളമാവില്ലേ ? ഞങ്ങളാണ് പട്ട തന്നതെന്ന് ആരെങ്കിലും അറിഞ്ഞാല്‍ അതിലും പ്രശ്നമാവും " പന്ജപാവങ്ങള്‍ ഞങ്ങള്‍ എരിതീയില്‍ പെട്രോള്‍ ഒഴിച്ചു കൊടുത്തു..

"രണ്ടെണ്ണം അടിച്ചാല്‍ എന്താവാനാടാ ??"

ആഹഹാ സന്തോഷം..

'ഒരെണ്ണം ഒഴീര്' എന്ന് പറഞ്ഞത് 'രണ്ടെണ്ണം അടിച്ചാല്‍ ' എന്നായത് എത്ര പെട്ടന്നായിരുന്നു .. ഇന്ന് സംഭവം കൊഴുക്കും..

നാട്ടില്‍ അന്ന് കുപ്പ്രസിദ്ധിയാര്‍ജിച്ച ഒരു ചേരുവ ഉണ്ടായിരുന്നു.. 'അട്ട' എന്ന ആ പൊടി കലക്കിയ ചാരായമാണ് ഞങ്ങള്‍ കൊണ്ടു വന്നിരുന്നത് . ഇതടിച്ചാല്‍ പിന്നെ പരസ്പ്പരബന്ധമില്ലാതെ എന്തെങ്കിലുമൊക്കെ വിളിച്ചു കൂവി ഒടുവില്‍ അട്ട ചുരുണ്ട് കിടക്കുമ്പോലെ എവിടെയെങ്കിലും ചുരുണ്ട് കൂടി കിടന്നോളും എന്നുള്ളത് കൊണ്ടാണ് പൊടിയ്ക്കു ആ പേര് കിട്ടിയത്..

ടച്ചിങ്ങ്സ് ആയി താറാവ് കൂട്ടാന്റെ ചാറിന്റെ ചാര്‍ സജി പിഴിഞ്ഞ് ഒരിലയില്‍ കൊണ്ടു വന്നിട്ടുണ്ടായിരുന്നു..

കുപ്പി കണ്ട ആശാന്‍ പ്ലാവില കണ്ട ആടിനെപ്പോലെ ആഹ്ലാദവിവശനായി.. പുള്ളി ഞങ്ങളുടെ കൂടെ ഇരുട്ടിലേയ്ക്കു മാറി നിന്നു.. ഒരു ഗ്ലാസ് ചാരായം അടിച്ചു.. ചാറില്‍ മുക്കി വിരല് തിന്നു..

"പൊടി ഉണ്ടല്ലോടാ" പരിശുദ്ധമായ ചാരായം മാത്രം ടേയ്സ്റ്റ് ചെയ്തു ശീലിച്ച ആശാന്റെ നാക്കിനു അതൊരു സര്‍പ്രൈസ് ആയിരുന്നു..

വെടിക്കെട്ടുകാരനെ പേടിപ്പിക്കാന്‍ പൊട്ടാസ് എറിഞ്ഞ പോലായി ഞങ്ങളുടെ അവസ്ഥ. പിടിക്കപ്പെട്ടു എന്ന് വിചാരിച്ച് ടെന്‍ഷനായി.. ടെന്‍ഷന്‍ കേറിയാല്‍ പിന്നെ അത് മാറ്റാന്‍ വേണ്ടി ആ ചാരായം ഞങ്ങള് തന്നെ കുടിക്കേണ്ടി വരുമല്ലോ എന്നോര്‍ത്ത് പിന്നേം ടെന്‍ഷന്‍ ..

"അത് പിന്നെ ഷാപ്പില്‍ കൊടുക്കാന്‍ അപ്പന്‍ എടുത്തു വച്ചതാ " കൊളുത്ത് സനല്‍ ഒരു വിധത്തില്‍ മൊഴിഞ്ഞു.. മിടുക്കന്‍ , തക്ക സമയത്ത് ഡയലോഗ് എടുത്തു കീറി.. ഇന്ന് ഞങ്ങള്‍ അവന്റെ ഫാന്‍സ്‌.

"ആ , പൊടിയെങ്കില്‍ പൊടി.. ദാഹം ശമിക്കട്ടെ"

അത് ശരി , അപ്പൊ ഇങ്ങേരു ഇതുവരെ പച്ച വെള്ളം പോലും കുടിച്ചിട്ടില്ല .. ചാരായത്തോട്‌ അസൂയ തോന്നിപ്പോയ നിമിഷം !

അട്ടയാണ് പൊടി എന്ന് ആശാന്‍ അറിയുന്നില്ലല്ലോ .. വീണ്ടും മോന്തി ഒരു ഗ്ലാസ് കൂടി..
ദൈവമേ, എന്തൊരു ആര്‍ത്തി.. ആറ്‌ മാസമായി ഫീല്‍ഡ് ഔട്ട്‌ ആയിരുന്ന വിത്ത് കാളയുടെ മുന്നില്‍ അബദ്ധവശാല്‍ ചെന്നു ചാടിയ പശുവിന്റെ അവസ്ഥയിലായി ചാരായക്കുപ്പി.

പത്തു പതിനഞ്ചു മിനുട്ടായി.. ആള് കുഴയാന്‍ രണ്ടെണ്ണം ധാരാളമാണ് ..നാലെണ്ണം അടിച്ചവര്‍ വാള് വയ്ക്കാതെ ചുരുണ്ടിട്ടില്ല... ആശാന്‍ മൂന്നു ഗ്ലാസ് വീശിക്കഴിഞ്ഞു.. സാധാരണ ആളല്ലല്ലോ .. ചാരായത്തിന്റെ മര്‍മ്മം അറിഞ്ഞവന്‍ അല്ലെ .. ബെനിഫിറ്റ് ഓഫ് ഡൌട്ട് ഗോസ് ഫോര്‍ ആശാന്‍ എന്ന തത്വത്തിന്റെ അടിസ്ഥാനത്തില്‍ ഞങ്ങള്‍ ഒരെണ്ണം കൂടി ആശാന് ഒഴിച്ചു കൊടുത്തു..

ബാര്‍ബര്‍ രവിയുടെ കത്തിയേക്കാള്‍ ഭംഗിയായി ചാറിരുന്ന വാഴയില ആശാന്‍ വിരലു കൊണ്ടു തുടച്ചു തുടച്ചു ഇലയെ ക്ലീന്‍ ഷേവ് ചെയ്യുന്നത് കണ്ട് സജി പയ്യെ പറഞ്ഞു..
"ഇല പറമ്പില്‍ കളയാനുള്ളതാ , നക്കാന്‍ വരുന്ന പട്ടി പ്രാകും ".. ഭാഗ്യത്തിന് ആശാന്‍ കേട്ടില്ല.. ഞങ്ങള്‍ അവനെ കലിപ്പിച്ചു നോക്കി !

ഒഴിച്ചു കൈ കുഴഞ്ഞെങ്കിലും ആശാന്‍ കുഴയുമോ എന്ന സംശയത്തില്‍ ആയിരുന്ന ഞങ്ങളുടെ മനസ്സില്‍ സന്തോഷത്തിന്റെ ആദ്യ വെടി മുഴങ്ങി ..
ഞങ്ങളുടെ സംശയത്തിനു വിരാമമിട്ടു കൊണ്ട് ആശാന്‍ മണിപ്രവാളം സംസാരിച്ചു തുടങ്ങി..

"എടാ നിങ്ങള്‍ക്കെന്നെ അറിയില്ലേ ? "

"പിന്നേ... ആശാനെ ഞങ്ങള്‍ക്കല്ലേ അറിയൂ " ഞങ്ങള്‍ കോറസ് പാടി

"ഇല്ല നിനക്കൊന്നും ഒരു കോപ്പും അറിയില്ല" . . ആഹാ അത് ശരി !

"ഒരു കലാകാരനായ എന്നെ എല്ലാരും ഒര്വാട് ദ്രോയിച്ചു. എനിക്കീ പീറ ക്ലബ്ബിനു വേണ്ടി വേഷം കെട്ടേണ്ട ഒരു ആവശ്യവുമില്ല.."

ആശാന്‍ പിന്നെ ഞങ്ങള്‍ ആരും കേള്‍ക്കാത്ത വേള്‍ഡ് ഫേമസ് നാടക ട്രൂപ്പുകളുടെ പേരും അതില്‍ ആശാന്റെ റോളുകളും 'ചേരും പടി ചേര്‍ക്കുക' എന്ന ചോദ്യത്തില്‍ കാണുന്നത് പോലെ വിളമ്പാന്‍ തുടങ്ങി.. നോഹയുടെ പെട്ടകത്തിലെ ദുഷ്യന്തനും , കാളിയമര്‍ദനത്തിലെ ഫാദര്‍ ബനഡിക്റ്റും ഒക്കെ പുള്ളിയുടെ മാസ്റ്റര്‍ പീസുകള്‍ ആയിരുന്നു പോലും ..

ദൈവമേ , വേലിയില്‍ കിടന്ന വെരുകിനെ എടുത്തു വിഐപി (സ്യൂട്കേസ് ആണ് ഞാന്‍ ഉദ്ദേശിച്ചത്)ക്കുള്ളില്‍ വച്ച പോലായോ ? ആശാന്‍ ഞങ്ങളെ വിട്ടു പിരിയാന്‍ വയ്യാത്ത വിധം ആത്മബന്ധം ബില്‍ഡ്അപ്പ്‌ ചെയ്യുന്നു.. ഇതു അട്ടയല്ല , തേരട്ടയാണ് .... എത്രെയും വേഗം സ്കൂട്ടാവണം..

സ്റ്റേജിനു പിറകില്‍ ആളനക്കം കേട്ടു.. ആശാനെ അന്വേഷിച്ചു സംവിധായകനും സംഘവും ആണ് വരുന്നതെന്ന് ഞങ്ങള്‍ ഉണര്‍ത്തിച്ചു.. ആശാനിലെ രാവണന്‍ സട കുടഞ്ഞെഴുന്നേറ്റു. ചാരായം കുടിച്ചു ബള്‍ബ് ആയ വയര്‍ റിലീസ് ചെയ്യാന്‍ വേണ്ടി ബെല്‍റ്റ്‌ രണ്ടു തുള മാറ്റിയിട്ടു.. പിന്നില്‍ തിരുകി വച്ചിരുന്ന പാളത്താര്‍ അഴിഞ്ഞോ എന്ന് സംശയം, (പുള്ളിയ്ക്കല്ല , ഞങ്ങള്‍ക്ക് ! പുള്ളിയ്ക്ക് ഇപ്പൊ ഒന്നിനേം കുറിച്ച് ഒരു സംശയോം ഇല്ല )

സ്റ്റേജിന്റെ പിന്നില്‍ വലതു വശത്ത് കൂടിയുള്ള പടികള്‍ കയറി വേണം രംഗത്ത് പ്രവേശിക്കാന്‍ .. ആശാന്‍ അങ്ങോട്ട് കയറാന്‍ ഒരുങ്ങുന്നത് കണ്ടു മനസ്സ് നിറഞ്ഞു ഞങ്ങള്‍ കാണികളുടെ ഇടയിലേയ്ക്കു ഓടി..

ബാലെ അരങ്ങു തകര്‍ക്കുന്നു.. സീതയ കാണാന്‍ വന്ന ഒരു വാനരനെ പിടിച്ചു കെട്ടി കൊണ്ടു വന്നിട്ടുണ്ട് എന്ന വാര്‍ത്ത അറിയിക്കാന്‍ ഒരു ഭൃത്യന്‍ രാവണ അന്തപ്പുരത്തില്‍ വരുന്നതാണ് സീന്‍ . .

"പ്രഭോ , പ്രഭോ , അങ്ങെവിടെയാണ് "

അതാ... രാവണന്‍ പടികള്‍ കയറി വരുന്നു.. വന്ന പാടെ അദ്ദേഹത്തെ വിളിച്ച ഭ്രുത്യനു മുന്നില്‍ സാഷ്ട്ടംഗം നമസ്ക്കരിച്ചു.. കിരീടം തെറിച്ചു അപ്പുറത്തും വീണു !!

എന്താണ് സംഭവിക്കുന്നതെന്ന് മനസിലാവാതെ ഞങ്ങളടക്കമുള്ള കാണികള്‍ എല്ലാവരും ശ്വാസമടക്കിപ്പിടിച്ചു നില്‍ക്കുവാണ്.. രാവണന്‍ ഇത്ര പാവമോ ? ഭ്രുത്യന്റെ കാലില്‍ വീഴുന്ന രാജാവോ ?

അതിലും വലിയ അവസ്ഥയിലായിരുന്നു ഭൃത്യന്‍ .. പുള്ളി പകച്ചു പോയി.. എന്നാലും കണ്ട്രോള്‍ തിരിച്ചു പിടിച്ചു പുള്ളി പറഞ്ഞു..

"പ്രഭോ , എന്താണിത് ? അങ്ങ് എന്റെ കാലില്‍ വീണു നമസ്ക്കരിക്കുന്നോ ? "

സംഭവിച്ചതെന്താണെന്ന് ഞങ്ങള്‍ക്ക് ഏകദേശം പിടികിട്ടി .. ബെല്‍റ്റ്‌ ലൂസ് ആക്കിയപ്പോള്‍ പിന്നില്‍ നിന്നും ഊരിവന്ന മുണ്ടിന്റെ അറ്റം പടി കയറുന്നതിനിടയില്‍ ആശാന്റെ കാലില്‍ കുടുങ്ങി.

ആശാന്‍ കമന്നടിച്ചു വീണ സീന്‍ ആണ് അല്‍പ്പം മുന്നേ കണ്ടത്. !!

രാവണന്‍ ചാടി എഴുന്നേറ്റു.. ജെസിബി കൊണ്ടു മണ്ണ് മാന്തിയെടുക്കുന്ന പോലെ കൈ കൊണ്ടു കിരീടം തപ്പി പെറുക്കിക്കൂട്ടി തലയില്‍ ഫിറ്റ് ചെയ്തു .. പിന്നിലേയ്ക്ക് എടുത്തു കുത്തിയിരുന്ന പാളത്താര്‍ മുന്നില്‍ അഴിഞ്ഞു കിടക്കുന്നു.. മീശയുടെ പൊസിഷന്‍ ആണ് കഷ്ട്ടം.. ഒരു വശം കോടിയിരിക്കുന്ന മീശ ഇപ്പൊ കണ്ടാല്‍ , ടിജി രവി ചുണ്ടില്‍ ചെരിച്ചു വച്ചു വലിക്കുന്ന പൈപ്പ് മാതിരി തോന്നും.. അതൊക്കെ സഹിക്കാം.. കിരീടമാണ് ആശാനെ ഏറ്റവും ചതിച്ചത്.. ഉരുണ്ട് പോയ കിരീടം തപ്പിയെടുത്തു ആശാന്‍ തലയില്‍ ഫിറ്റ്‌ ചെയ്തപ്പോള്‍ സംഭവം തലതിരിഞ്ഞു പോയി..

മൂക്കിടിച്ചു വീണു കലിപ്പായ ആശാന്‍ പിന്നെ ഒന്നും നോക്കിയില്ല .. അഴിഞ്ഞ മുണ്ട് എടുത്തു അങ്ങട് മടക്കിക്കുത്തി..

ബാലരമയിലെ വിക്രമന്റെ ഷര്‍ട്ട്‌ പോലെ, ചുവപ്പില്‍ വെള്ള വരകളുള്ള ആശാന്റെ ഡ്രായര്‍ മുണ്ടിനടിയില്‍ കൂടി പുറംലോകം കണ്ടു.. ഒന്‍പതു മുടികളും നടുക്ക് ഒരു മുഖവുമായി ,മുണ്ടും മടക്കിക്കുത്തി നെഞ്ചും വിരിച്ചു ആശാന്‍ അങ്ങനെ നില്‍ക്കുവാണ്..

കാണികള്‍ തലതല്ലി ചിരിക്കുന്നു.. ഞങ്ങള്‍ ചിരിച്ചു ചാവും എന്ന അവസ്ഥയായി.. പക്ഷെ ആശാന്‍ കൊല്ലാന്‍ പോകുന്നേയുള്ളൂ.. കോളാമ്പിയിലൂടെ ആ ശബ്ദം മുഴങ്ങി...

"ആരെടാ പെരട്ടേ നിന്റെ കാലില്‍ വീണത് ? പ്ഫാ ... " രാവണന്‍ തന്റെ ഖഡ്ഗം എടുത്തു പൊക്കിപ്പിടിച്ച് ആക്രോശിച്ചു.

ഫ്രിത്യന്റെ പടം പകുതി മടങ്ങി.. എന്നാലും തപ്പിത്തടഞ്ഞു പുള്ളി പറഞ്ഞു :

"ലങ്കയില്‍ അതിക്ക്രമിച്ചു കയറിയ ഒരു വാനരനെ ഞങ്ങള്‍ പിടിച്ചു കെട്ടി കൊണ്ടു വന്നിട്ടുണ്ട് പ്രഭോ.. "
ഇതും പറഞ്ഞുകൊണ്ടു ,രാവണന്റെ അനുമതിയ്ക്കു കാത്തു നില്‍ക്കാതെ പുള്ളി തന്നെ ഹനുമാനെ കൊണ്ടുവരാന്‍ ഓടി ..രണ്ടു ഭടന്മാര്‍ ചേര്‍ന്ന് ഹനുമാനെ വരിഞ്ഞു കെട്ടി സ്റ്റേജിലേയ്ക്ക് കൊണ്ടു വന്നു..

"പ്രഭോ , ഇവനെ എന്ത് ചെയ്യണം ? "

(എന്റെ ഓര്‍മ ശരിയാണെങ്കില്‍ , വാലില്‍ തീ കൊളുത്താനാണ് ഒറിജിനല്‍ രാവണന്‍ പറഞ്ഞത്.. പക്ഷെ ആശാന്റെ ഓര്‍മ ഇപ്പൊ ശരിയല്ലല്ലോ..)

"ലിവന്റെ തല മൊട്ടയടിച്ചു ദേഹത്ത് പുള്ളി കുത്തി കഴുതപ്പുറത്ത് ഇരുത്തി നാട് കടത്തഡേയ് " രാവണന്‍ ആജ്ഞാപിച്ചു ..

എല്ലാവരും ഞെട്ടി .. കൂടുതല്‍ നേരം അവിടെ നിന്നാല്‍ ഹനുമാന്‍ ഇടി മേടിയ്ക്കും എന്ന് മനസിലായ ഭടന്മാര്‍ ഹനുമാനേം കൊണ്ടു അവിടുന്ന് സ്കൂട്ടായി !!

സംഗതി അലമ്പായെന്നു സംവിധായകന് മനസിലായി.. പല സീനുകളും കട്ട് ചെയ്തു എത്രെയും പെട്ടെന്ന് ബാലെ തീര്‍ക്കാനുള്ള തിടുക്കത്തിലായി എല്ലാവരും.. അത് കൊണ്ടു ഏറ്റവും ഡെസ്പ്പായത് ഹനുമാനാണ്.. ലങ്കയില്‍ തീയിടാനുള്ള സുവര്‍ണ്ണാവസരം ഹനുമാന് നഷ്ട്ടപ്പെട്ടു.. !!

പിന്നിലെ സീന്‍കര്‍ട്ടന്‍ വീണ്ടും മാറി.. ഇപ്പോള്‍ അശോകവനി ആണ് ബാക്ഗ്രൌണ്ട് .. സംഭവവികാസങ്ങള്‍ ഒക്കെ കണ്ടു പേടിച്ചരണ്ട സീത രാവണന്റെ കണ്ണില്‍പ്പെടാതെ ഇടതു വശത്ത് കൂടി പമ്മിപ്പമ്മി വന്നു ഒരു മൂലയ്ക്കിരുന്നു..

ഭൃത്യന്‍ വീണ്ടും രാവണന്റെ അടുത്ത് ചെന്നു..

"പ്രഭോ, സീതയെ തട്ടിക്കൊണ്ടു പോയതിനു പകരം ചോദിക്കാന്‍ രാമന്‍ എത്തിക്കഴിഞ്ഞു.."

ആശാന്റെ സകല കണ്ട്രോളും പോയിക്കഴിഞ്ഞിരുന്നു.. മൂക്കിടിച്ച വേദനയുടെ പുറമേ ചാരായത്തിന്റെ എഫ്ഫക്ടും ആയപ്പോള്‍ കരണ്ടടിച്ച അണ്ണാനെ പോലെ പുള്ളി നിന്നു വിറയ്ക്കുകയാണ്..

"ഛീ , കണ്ട പെണ്ണുങ്ങളെ തട്ടിക്കൊണ്ടു വന്നിട്ട് നിന്നു കാണാ കുണാ പറയുന്നോടാ.. ഇവിടെ മനുഷ്യന്റെ മൂക്കിന്റെ പാലം ഒടിഞ്ഞു.. അപ്പോഴാണ്‌ അവന്റെ രാമന്‍ .. അവനിങ്ങു വരട്ടെ .. ഇടിച്ചു പരിപ്പിളക്കും ഞാന്‍ "

അതിമനോഹരം !

അവിടെ വച്ചു കര്‍ട്ടനിട്ടാല്‍ മതിയായിരുന്നു.. പക്ഷെ കണ്ടകശനി കൊണ്ടേ പോകൂ എന്നാണല്ലോ.. ആര്‍ക്കും ആ ബുദ്ധി തോന്നിയില്ല ...

ദേഷ്യവും പേടിയും കൂടിക്കലര്‍ന്ന ഒരു പ്രത്യേക തരം ദയനീയാവസ്ഥയില്‍ ഭൃത്യന്‍ വീണ്ടും പറഞ്ഞു ..

"പ്രഭോ , ഞാന്‍ അല്ലാ , അങ്ങയാണ് സീതയെ തട്ടിക്കൊണ്ട് വന്നത്" ഭൃത്യന്‍ ചോദ്യഭാവത്തില്‍ എന്ന പോലെ സീതയുടെ നേര്‍ക്ക് കൈ ചൂണ്ടി.. സീതയാണെങ്കില്‍ നിക്കണോ പോണോ എന്ന രീതിയില്‍ ഓടാന്‍ റെഡിയായി നില്‍ക്കുവാണ്.. എന്തും സംഭാവിക്കാലോ ...

പോരെ പൂരം..

"കഴുവേര്‍ഡ മോനെ , ഈ എസ്തപ്പനാശാന്‍ കള്ളു കുടിക്കും , കന്ജാവടിക്കും , പക്ഷെ ഇതു വരെ ഒരു പെണ്ണ് കേസിലും പെട്ടിട്ടില്ലെടാ.. നല്ല അന്തസ്സുള്ള തറവാട്ടില്‍ ജനിച്ചവനാടാ ഞാന്‍ "

നിന്ന നില്‍പ്പില്‍ പീച്ച്ചേമൂട്ട് അടിച്ച ആശാന്‍ സീതയെ നോക്കി പറഞ്ഞു

"പെങ്ങളേ , പെങ്ങള് പേടിക്കേണ്ട, ഒരുത്തനും ഇവിടെ വന്നു ഒരു ചുക്കും ചെയ്യില്ല "

ഠിം !!.. എല്ലാം തീര്‍ന്നു... ബാലെയുടെ ശവപ്പെട്ടിയില്‍ അവസാന ആണിയും ആശാന്‍ അടിച്ചു ..

കാണികള്‍ എഴുന്നേറ്റു നിന്നു കൂവലും വിസിലടീം ചീത്ത വിളീം .. ആകെ ബഹളം ... പച്ചക്കറി , പഴ വര്‍ഗങ്ങള്‍ എന്നിവ ചെറിയ തോതില്‍ അന്തരീക്ഷത്തില്‍ പറക്കാനും തുടങ്ങി..

ഞങ്ങള്‍ക്ക് കിട്ടാനുള്ള കളക്ഷനാണ് ഈ പറക്കുന്നത്.. ആ പോട്ട് .. ഒരു നല്ല കാര്യത്തിനു വേണ്ടിയല്ലേ.. ഞങ്ങള്‍ നിലത്തു കുത്തിയിരുന്ന് അവയുടെ റൂട്ട് ക്ലിയര്‍ ആക്കിക്കൊടുത്തു.. ഹല്ലാ പിന്നെ ...

സീതയും ഭ്രുത്യനും പരസ്പ്പരം കൂട്ടിയിടിക്കാതെ ഒരു വിധത്തില്‍ ഓടി രക്ഷപെട്ടു.. ആശാന്‍ മാത്രം അടുത്ത സീനിനു വേണ്ടി വെമ്പി നില്‍ക്കുകയാണ്.. നാട്ടിലെ ഏതോ ഒരു ലിംബാറാം എയ്ത ഒരു തക്കാളി കൃത്യമായി ആശാന്റെ മുഖത്ത് തന്നെ വീണു അമിട്ട് പൊട്ടണ മാതിരി ചിതറി..

അട്ടയുടെ എഫക്റ്റിനു മുകളില്‍ ചീഞ്ഞ തക്കാളിയുടെ നാറ്റം കൂടിയായപ്പോള്‍ ആശാന്റെ സകല കണ്ട്രോളും വിട്ടു.. തീ തുപ്പാന്‍ പോകുന്ന ഡ്രാഗണ്‍ മാതിരി ഒന്ന് പിന്നോട്ടാഞ്ഞ രാവണന്‍ വേച്ചു വേച്ചു മൈക്കിനടുത്തു ചെന്നു..

ഗ്വാ............................!!!!!!!!!!!!!!!!!

ദിഗന്തങ്ങള്‍ നടുക്കിയ ആ ശബ്ദം കോളാമ്പിയിലൂടെ മുഴങ്ങി

കൈവിട്ട ആയുധവും വാ വിട്ട വാളും ആര്‍ക്കും തിരികെയെടുക്കാന്‍ പറ്റില്ല എന്നാണല്ലോ ... പൊടിയുടെ നാലാംഘട്ടം വിജയകരമായി പൂര്‍ത്തിയാക്കിയ ആശാന്‍ , സാക്ഷാല്‍ അട്ട പോലും നാണിച്ചു പോകുന്ന ഷേപ്പില്‍ ചുരുണ്ട് കൂടി സ്റ്റേജിന്റെ ഒരു മൂലയില്‍ പോയി കിടന്നു..

---ശുഭം---

അന്ന് മുതല്‍ ഇന്ന് , ഈ നിമിഷം വരെ , ചെര്‍പ്പില്‍ക്കാവിന്റെ ചരിത്രത്തില്‍ , പേരിനെ ഇത്ര അന്വര്‍ത്ഥമാക്കിയ ഒരു ബാലെയും നാടകവും ഉണ്ടായിട്ടില്ല..

രാവണഖഡ്ഗം , അഥവാ , രാവണന്റെ വാള്‍ !! !!

പൊട്ടനെ ചെട്ടി പറ്റിച്ചാല്‍ ചെട്ടിയെ ദൈവം പറ്റിക്കും എന്നാണല്ലോ പ്രമാണം ! ആശാനെയും ട്രൂപ്പിനെയും പറ്റിച്ച ശേഷം പിറ്റേ ദിവസം ഞങ്ങള്‍ വളരെ ശ്രദ്ധയോട് കൂടിയാണ് ഞങ്ങളുടെ നാടകം അവതരിപ്പിച്ചത്.. വെള്ളമടിച്ചില്ല , ഡയലോഗ് തെറ്റിച്ചില്ല .. പക്ഷെ എന്നിട്ടും !!! ! പാദരക്ഷകളും പച്ചക്കറികളും ഒന്നും ഞങ്ങള്‍ക്ക് കിട്ടിയില്ല .. പക്ഷെ കിട്ടിയത് മറ്റൊന്നായിരുന്നു... ആ സംഭവം ഇനിയൊരിക്കല്‍ പറയാം :-)

രാവണഖഡ്ഗം (ഇടവേളയ്ക്കു മുന്‍പ്)

2010-06-04T11:31:00.000-07:00

അങ്ങനെ, ചെര്‍പ്പില്‍ക്കാവിലെ ഉത്സവം അടുക്കാറായി ..

കഴിഞ്ഞ നാലു വര്‍ഷമായി സ്ഥിരം അവിടെ നാടകം അവതരിപ്പിക്കുന്ന സംഘമാണ് ആല്‍ത്തറ ബ്രദേര്‍സ് (ഹ്ഹോ സമ്മതിക്കണം) .. ഈ നാലു വര്‍ഷവും ഞങ്ങളുടെ നാടകത്തില്‍ അഭിനയിക്കുന്നവര്‍ ഒരേ ആളുകള്‍ (ഇപ്പൊ സമ്മതിച്ചല്ലോ അല്ലെ ? ) !!

ആളുകള്‍ മാത്രമല്ല ഒരേ ഉള്ളത് ..

ഒരേ കഥ , ഒരേ സീനുകള്‍ , ഒരേ വേഷങ്ങള്‍ ..

ഇതൊന്നും വേണംന്ന് വച്ചു ചെയ്യുന്നതല്ല.. കഥ , തിരക്കഥ , സംഭാഷണം , സംവിധാനം , ഗാനരചന , സംഗീതം തുടങ്ങി ഒരു സീരിയലിലെ എല്ലാ ചുമടുകളും എടുത്തിട്ടും ക്ഷീണിക്കാതെ അതില്‍ ഡബിള്‍റോളും ചെയ്തു തിളങ്ങിയിരുന്ന മധുമോഹന്‍ ആയിരുന്നു അക്കാലത്തെ ഞങ്ങളുടെയൊക്കെ ഹീറോ ! ഉടുക്കുന്ന ലുങ്കി പോലും മാറാതെ പുള്ളിക്ക് ഇത്രെയുമൊക്കെ ചെയ്യാമെങ്കില്‍ ഞങ്ങള്‍ക്കെന്തു കൊണ്ടു ആയിക്കൂടാ എന്ന ചിന്തയാണ് ഞങ്ങളെ അങ്ങിനെയാക്കിയത് ..ഹല്ല പിന്നെ !

ഭഗവതി സഹായിച്ച് എല്ലാ വര്‍ഷവും ഞങ്ങളുടെ നാടകത്തിന്റെ കളക്ഷന്‍ കൂടിക്കൂടി വരാറുണ്ട് എന്നത് മാത്രമാണ് ആകെയുള്ള സമാധാനം.. കഴിഞ്ഞ വര്‍ഷം അര്‍മാദിച്ചു.. ചീഞ്ഞതെന്നു വിചാരിച്ച് തീര്‍ത്തും മണ്ടന്മാരായ ഞങ്ങളുടെ നാട്ടിലെ കാണികള്‍ എറിഞ്ഞ പല തക്കാളികളും ചീഞ്ഞതല്ലായിരുന്നു.. അത് വച്ചു നല്ല അസ്സല് മോരുകറി അമ്മ ഉണ്ടാക്കിത്തന്നു .. കൊളസം മണി അവന്റെ അനിയന് കൊടുത്തത് ഏതോ ഒരുത്തന്‍ എറിഞ്ഞു കൊടുത്ത നല്ല ഒരു ജോഡി ചെരുപ്പാണ് .. ചുരുക്കം പറഞ്ഞാല്‍ , ഇങ്ങനെ എന്തെങ്കിലുമൊക്കെ തടയും എന്ന് പ്രതീക്ഷിച്ചു മാത്രമായി ഇപ്പൊ നാടകം കളിക്കല്‍ എന്ന അവസ്ഥയായി...

പക്ഷെ ഞങ്ങളുടെ എതിരാളികള്‍ (സ്റ്റാര്‍ ഫ്രെണ്ട്സ് ക്ലബ്) കാശുള്ളവര്‍ ആയിരുന്നു.. അന്നത്തെ ട്രെന്‍ഡ് ആയ ബാലെ ആയിരുന്നു ആ വര്‍ഷം അവന്മാര്‍ പ്ലാന്‍ ചെയ്തിരുന്നത്.. അതും പുരാണ കഥ !

എല്ലാ വര്‍ഷവും അവരുടെ പരിപാടിക്ക് കയ്യടിയും ഞങ്ങളുടെ നാടകത്തിനു കല്ലേറും മാത്രം കിട്ടിയിരുന്നത് കൊണ്ടു സ്വാഭാവികമായും അസൂയ എന്ന വികാരം ഞങ്ങളുടെ ഉള്ളില്‍ കൂട് കൂട്ടിക്കഴിഞ്ഞിരുന്നു ..

അസൂയ , അതല്ലേ എല്ലാം ... !

"ഇത്തവണ അവരുടെ പരിപാടി പൊളിക്കണം " സനല്‍ ഇടി കിട്ടാനുള്ള വകുപ്പുകള്‍ ഇറക്കിത്തുടങ്ങി..
"എങ്ങനെ" എല്ലാരും ആകാംക്ഷിച്ചു ..
"എസ്തപ്പാന്‍ ആശാന്‍ ആണ് മക്കളേ പ്രധാന നടന്‍ ... പോരെ ? " സനല്‍ പറഞ്ഞു

തുരുപ്പ് കളിക്കുമ്പോള്‍ നാലു ജാക്ക് ഒന്നിച്ചു വന്ന മാതിരി എല്ലാരുടേം മുഖം തെളിഞ്ഞു.

എസ്തപ്പാന്‍ ആശാന്‍ ... കലാകാരന്മാരിലെ ഏറ്റവും വലിയ കുടിയന്‍ , അല്ലെങ്കില്‍ , ഏറ്റവും വലിയ കുടിയന്മാരിലെ കലാകാരന്‍ .. (കടപ്പാട്: സ്വാതി തിരുന്നാള്‍ )
ഒറ്റവാക്കില്‍ പറഞ്ഞാല്‍ മാന്നാര്‍ മത്തായിയിലെ ഗീര്‍വാസീസ് ആശാനെപ്പോലത്തെ ഒരു ഐറ്റം..

പ്രായം കുറച്ചായെങ്കിലും ആള് സുന്ദരനാണ്.. ചിരിക്കുമ്പോള്‍ ആശാന്റെ മുഖം കണ്ടാല്‍ പഴയ അശോക്‌ ലെയ്ലാന്ഡ് ബസ്സിന്റെ ഗ്രില്‍ പോലെ മനോഹരമാണ് ..
പട്ടയടിയുടെ കാര്യത്തില്‍ എന്റെ ചിറ്റപ്പന്‍ ധിംധി മത്തായി ആണെങ്കില്‍ എസ്തപ്പാന്‍ ആശാന്‍ ഫാന്റം പൈലിയാണ്..

കനത്ത വെള്ളമടി കാരണം പുള്ളിയെ ഈയിടെയായി നാടകങ്ങളില്‍ കാണാറില്ല .. പക്ഷെ,വിനാശകാലേ വിപരീത ബുദ്ധി എന്നുള്ള ചൊല്ല് അന്നും ഉണ്ടായിരുന്നതിനാല്‍ സ്റ്റാര്‍ ഫ്രെണ്ട്സ്ഇത്തവണ ബാലെ കളിക്കാന്‍ ആശാനെ ബുക്ക്‌ ചെയ്തു.. ആശാന്‍ ഞങ്ങളുമായി നല്ല കമ്പനിയാണ്.. അത് കൊണ്ടു ഈ ന്യൂസ് കേട്ട ഉടനെ ഞങ്ങള്‍ നേരെ അങ്ങേരുടെ അടുത്ത് ചെന്നു..

ചാര പ്രവൃത്തി ചെയ്തു നല്ല ശീലമുള്ളത് കൊണ്ട് നയത്തില്‍ പുള്ളിയോട് കാര്യങ്ങള്‍ ചോദിച്ചറിഞ്ഞു.. ബാലെയുടെ പേര് രാവണഖഡ്ഗം .. വമ്പിച്ച സെറ്റപ്പ് ആണ് പോലും..ആശാനാണ് രാവണന്‍ ! കൊസ്ട്ട്യൂംസ് റെഡി ആവുന്നു , റിഹേഴ്സല്‍ തുടങ്ങിക്കഴിഞ്ഞു.. ഇങ്ങനെ ഓരോന്നൊക്കെ പറഞ്ഞു ആശാന്‍ ഞങ്ങളുടെ കോണ്‍ഫിഡന്‍സ് ചവിട്ടിതാഴ്ത്തികൊണ്ടിരുന്നു.. ആശാന് ഒരു പട്ടക്കുപ്പിയും കാഴ്ച വച്ചു ഞങ്ങള്‍ മടങ്ങി..

അവന്മാരുടെ ബാലെ എങ്ങനെ അലമ്പാക്കും എന്ന വിഷയം അന്ന് തന്നെ ഗവേഷണത്തിന് വച്ചു. പല പ്രബന്ധങ്ങളും അവതരിക്കപ്പെട്ടു.. പക്ഷെ, എങ്ങനെ സാരി ഉടുത്താലും സില്‍ക്ക് സ്മിത വാഷര്‍ കാണിച്ചിരിക്കും എന്ന് പറയുമ്പോലെ , എത്രെയൊക്കെ നല്ല കാര്യങ്ങള്‍ ആലോചിച്ചിട്ടും ഞങ്ങള്‍ അവസാനം ഉഡായിപ്പില്‍ തന്നെ എത്തിച്ചേര്‍ന്നു.. എസ്തപ്പാന്‍ ആശാനെ പട്ട കൊടുത്തു മയക്കുക.. പിന്നെ നാടകം തനിയെ അലമ്പായിക്കോളും..

അങ്ങനെ പദ്ധതി തയ്യാറായി..

കാത്തിരിപ്പിനൊടുവില്‍ ഉത്സവം തുടങ്ങി.. മൂന്നാം നാള്‍ ആണ് ബാലെ.
സംഭവം നടപ്പിലാക്കാന്‍ അല്‍പ്പം ബുദ്ധിമുട്ടുണ്ട്.. ഞങ്ങളുടെ തലവെട്ടം അവിടെ എവിടെയങ്കിലും കണ്ടാല്‍ മറ്റവന്മാര്‍ക്ക് ഡൌട്ട് അടിക്കും.. ഇടവേളയ്ക്കു മുന്പ് ആശാന്‍ രാവണന്റെ റോള്‍ അവിടെ തകര്‍ത്തു അഭിനയിക്കുന്നത് കണ്ട് ഡെസ്പ്പായ ഞങ്ങള്‍ പമ്മിപ്പതുങ്ങി സ്റ്റേജ്ന്റെ പിന്‍വശത്ത് കാത്തിരുന്നു..

ഇടവേള !

നാടകം 1 : രാവണഖഡ്ഗം (ഇടവേളയ്ക്കു ശേഷം) തുടര്‍ന്നേക്കും .. .......... ..... ..............

(സത്യസന്ധമായ എല്ലാ അഭിപ്രായങ്ങള്‍ക്കും ഒരുപാട് നന്ദി.. ഇനി ആ സത്യം ഞാന്‍ തുറന്നു പറയാം.. എന്നെ ആരും തടുക്കരുത്..

ഏകദേശം ഒരു ഒന്നര ഉണ്ടായിരുന്നു കയ്യില്‍ .. രണ്ടു പെഗ്ഗ് ആക്കാനും വയ്യ, ഒരു പെഗ്ഗിനു മുകളില്‍ ഉണ്ട്താനും .. ന്നാ പിന്നെ ആദ്യം ഒരു സ്മോള്‍ ഒഴിച്ചിട്ട് പിന്നെ ആ പെഗ്ഗ് അങ്ങട് ഒഴിക്കാം എന്ന് വച്ചു..
ഒരിക്കല്‍ കൂടി.. എല്ലാവര്‍ക്കും നന്ദ്രി നന്ദ്രി ..പെഗ്ഗ് ഉടനെ വരുന്നതാണ് )

ചില്ലി ഡക്ക് റോസ്റ്റ്

2010-04-20T02:03:00.000-07:00

ഇടവപ്പാതി തുടങ്ങിയാപ്പിന്നെ അവധി ദിവസങ്ങളില്‍ ഞങ്ങള്‍ എല്ലാരും അമരത്തിലെ അച്ചൂട്ടിമാരാണ്...

രാവിലെ എഴുന്നേറ്റ് ഫുഡിംഗ് കഴിഞ്ഞാല്‍ ഉടന്‍ തന്നെ തോര്‍ത്ത്‌ മുണ്ടും ഉടുത്ത്‌, ചൂണ്ടയും തെറ്റാലിയും വലയും ഒക്കെ തോളത്തു വച്ചു പുഴയിലേക്ക് കെട്ടിയെടുക്കും.. ചൂണ്ടക്കോലും തോളത്തു വച്ചു വരിവരിയായി എല്ലാരും നീങ്ങുന്ന ആ കാഴ്ച കണ്ടാല്‍ മലയാറ്റൂര്‍ കുരിശു മല കയറാന്‍ കുരിശും ചുമന്നു പോകുന്നതാണെന്ന് വരെ തോന്നിപ്പോകും..

ആദ്യമൊക്കെ ഞങ്ങളുടെ ഈ യാത്ര വീട്ടുകാര്‍ വളരെ ആവേശത്തോട്‌ കൂടിയാണ് കണ്ടിരുന്നത്.. മക്കള്‍ കൊണ്ടു വരുന്ന കൊമ്പന്‍സ്രാവിനെ കറി വയ്ക്കാന്‍ റെഡി ആയി ഇരിക്കാറുള്ള ഞങ്ങളുടെ മാതാജിമാര്‍ , വൈകുന്നേരം ഞങ്ങള്‍ കൊണ്ടുക്കൊടുക്കുന്ന ഒന്നോ രണ്ടോ തുപ്പലംകൊത്തി , ഈര്‍ക്കിലി കോലായി , പരല്‍ തുടങ്ങിയ 'പടുക്കൂറ്റന്‍ ' മീനുകളുടെ ഭയാനക രൂപം കണ്ടതോടെ ആവേശമൊക്കെ പോയി ചീത്തവിളി തുടങ്ങിയിരുന്നു !

പുഴയില്‍ പോകുന്നത് കൊണ്ടു രണ്ടുണ്ട് ഗുണം എന്ന് അവര്‍ക്ക് അറിയില്ലല്ലോ.. അങ്കവും കാണാം താളിയും പറിക്കാം (കുളിസീന്‍ കാണാലോ ) എന്ന ലൈനില്‍ പുഴവക്കിലേക്കുള്ള യാത്ര ഞങ്ങള്‍ നിര്‍ബാധം തുടര്‍ന്നു..

ചൂണ്ടയിടാന്‍ (ന്ന പേരില്‍ ) ഞങ്ങള്‍ നില്‍ക്കുന്ന ചിറയിലൂടെയാണ് കടത്തുകാരന്‍ ജെയിംസിന്റെ താറാവിന്‍കൂട്ടം എന്നും റാമ്പ് വാക് നടത്തിയിരുന്നത്.. ഒരു ദിവസം അതില്‍ കാണാന്‍ കൊള്ളാവുന്ന ഒരു പൂവന്‍ താറാവ് ഫീമെയില്‍ ഡക്സിന്റെ മുന്നില്‍ ഷൈന്‍ ചെയ്യാനാണോ എന്തോ , വെറുതെ ഉറക്കം തൂങ്ങി ചൂണ്ടയിട്ടോണ്ടിരുന്ന ടെറര്‍ സുനിയെ ഒരു കാരണവുമില്ലാതെ വിളിച്ചെഴുന്നേല്‍പ്പിച്ച് ഓടിച്ചിട്ട്‌ കൊത്തി !

അടിതെറ്റിയ സുനി പാടത്തേക്ക് ചാടി.. ചെളിയില്‍ പൂണ്ട സുനിയെ ഹെല്‍പ്പാന്‍ വന്ന ഞങ്ങള്‍ രോഷം പൂണ്ട സുനിയെ നോക്കാതെ ആര്‍ത്തി പൂണ്ട കണ്ണുകളോടെ ആ പൂവന്റെ ഇറച്ചിത്തൂക്കം നോക്കി മധുരപ്പുളി കണ്ട് നാക്കില്‍ വെള്ളം വരുന്നത് പോലെയുള്ള അവസ്ഥയില്‍ കണ്ണും മിഴിച്ചു നിന്നു...

"അവനെ റോസ്റ്റാക്കണം" സുനി പ്രതികാരദാഹിയായി ആക്രോശിച്ചു !

ആഹാ.. ഞങ്ങള്‍ ഇച്ച്ചിച്ചതും ടെറര്‍ കല്‍പ്പിച്ചതും റോസ്റ്റ് ...

പിന്നെന്തു വേണം .... വിത്തിന്‍ മിനിട്സ്, പ്ലാന്‍ റെഡി ! ജെയിമ്സ്സേട്ടന്‍ കാപ്പി കുടിക്കാന്‍ പോണ തക്കത്തിന് ലവനെ പൊക്കുക.. താറാവിന്റെ മാനറിസങ്ങള്‍ നന്നായി അറിയാവുന്ന താറാവ് സജി തന്നെ ആ ദൌത്യം ഏറ്റെടുത്തു..

ആയിടെ ടൌണില്‍ ഫാസ്റ്റ് ഫുഡ് കള്‍ച്ചര്‍ ഇന്ട്രോഡ്യൂസ് ചെയ്ത സിങ്കപ്പൂര്‍ ഗോപി ചേട്ടന്റെ അടുത്ത് നിന്നും റോസ്റ്റ് ഉണ്ടാക്കുന്ന വിധം മനസിലാക്കാന്‍ മണിയെ ഞങ്ങള്‍ ഓണ്‍സൈറ്റ് പറഞ്ഞു വിട്ടു..

ഓണ്‍സൈറ്റില്‍ നിന്നും തിരിച്ചു വന്ന മണിയുടെ കയ്യിലെ പ്രോജെക്റ്റ്‌ പ്ലാനില്‍ തക്കാളി , സവാള , തുടങ്ങിയ ലോക്കല്‍ ഐറ്റംസിന്റെ കൂടെ കോണ്‍ഫ്ലവര്‍ എന്നൊരു പേരും ഉണ്ടായിരുന്നു.. എല്ലാരും തലകുത്തി ആലോചിച്ചിട്ടും അതെന്തു പൂവ് എന്ന് മനസിലായില്ല.. നാട്ടിലെ ഏക ഇംഗ്ലീഷ് മീഡിയം വിദ്യാര്‍ഥിയായ അവതാക്കുഞ്ഞിന്റെ മകന്‍ ജോര്‍ജിനോടു പോയി ചോദിച്ചു.. അങ്ങനെ ഒരു ഫ്ലവര്‍ എന്തെന്ന് തികഞ്ഞ ബുജിയായ അവനും അറിയില്ല..

സംഭവം കേട്ട അവതാക്കുഞ്ഞിന്റെ പെണ്ണുമ്പിള്ളയാണ് ആ വിചിത്ര ഫ്ലവറിന്റെ ദുരൂഹത മാറ്റിയത്.. അത് പൂവും കായുമൊന്നുമല്ല , ചിക്കന്‍ ഒക്കെ ഉണ്ടാക്കാന്‍ ഉപയോഗിക്കുന്ന ഒരു പൊടിയാണ് എന്ന്.. എന്തായാലും ആ പൊടി ഞങ്ങളുടെ നാട്ടില്‍ കിട്ടില്ലെന്നും , പകരം കെയ്ക്ക് ഉണ്ടാക്കാന്‍ ഉപയോഗിക്കുന്ന ബെയ്ക്കിംഗ് പൌഡര്‍ മതിയെന്നും അമ്മച്ചി പറഞ്ഞത് കേട്ടു ഞങ്ങള്‍ ഹാപ്പിയായി മടങ്ങി..

റോസ്റ്റിനുള്ള കൂട്ടുകള്‍ വാങ്ങാന്‍ പിള്ളാച്ചന്റെ പലച്ചരക്കുകടയിലെക്ക് മറ്റേ ദാഹിയായ ടെറര്‍ തന്നെ പോയി..

പിള്ളാച്ചന്‍ ! തൊട്ടുപിന്നില്‍ ഒരു കതിന പൊട്ടിച്ചാല്‍ പോലും പിള്ളാച്ചന്‍ അനങ്ങില്ല .. അമ്പോ ! അത്രയ്ക്ക് ധൈര്യമോ എന്ന് വിചാരിക്കേണ്ട.. ആള്‍ക്ക് ചെവി അല്‍പ്പം പതുക്കെയാണ്.. കഴിഞ്ഞ വിഷുവിനു പുള്ളിയെ ഒന്ന് പേടിപ്പിക്കാന്‍ വേണ്ടി കടയുടെ പിന്നില്‍ നിന്നു ഞങ്ങള്‍ പടക്കം പൊട്ടിച്ചെങ്കിലും പുക പൊങ്ങുന്നത് കണ്ട് ഞങ്ങള്‍ ഒക്കെ ബീഡി വലി തുടങ്ങി എന്ന് വീട്ടില്‍ ചെന്നു പറഞ്ഞു കൊടുത്ത കക്ഷിയാണ് പിള്ളാച്ചന്‍ !

കണാരന്‍ ചേട്ടന്റെ മാട്ടം അടിച്ചു മാറ്റി സല്‍പ്പുത്രന്‍ സനല്‍ കൊണ്ടു വന്ന കള്ളു അല്‍പ്പം മോന്തിയിട്ടാണ് പ്രോഗ്രാം ആരംഭിക്കുന്നത്.. താറാവിനെ പൊക്കിയ സജി , കോര്‍ക്ക് സോഡാ തുറക്കുന്ന ലാഘവത്തോടെ അതിന്റെ കഴുത്ത് പിരിച്ച് കാലന്റെ ബസ്സില്‍ കയറ്റി വിട്ടു ! ഡ്രസ്സിംഗ് എന്ന അണ്‍ഡ്രസ്സിങ്ങും മിനുട്ടുകള്‍ക്കുള്ളില്‍ കഴിഞ്ഞു..

റോഡില്‍ നിന്നും അകലെ പാടത്തിന്റെ നടുക്കുള്ള ചിറയില്‍ ആണ് അടുക്കള.. ചേരുവകളുമായി ടെറര്‍ സുനി വരുന്നതും കാത്ത് ഞങ്ങള്‍ റോഡില്‍ നില്‍ക്കുന്നു.
അപ്പോഴാണ്‌ കൊടും മാരണം ചിറ്റപ്പന്റെ ഫ്രെണ്ട് കോട്ടമാങ്ങ അത് വഴി വന്നത് .. ടെലിഫോണ്‍ പോസ്റ്റ്‌ കണ്ടാല്‍ പട്ടിക്കു മുള്ളാന്‍ മുട്ടും എന്ന് പറയുന്ന പോലെ ഞങ്ങളെ കണ്ടാല്‍ എന്തെങ്കിലും ഒരു കൊടുക്കല്‍ വാങ്ങല്‍ നടത്തിയില്ലേല്‍ പുള്ളിയ്ക്ക് വല്യ വെഷമമാണ്...

"എല്ലാ വാനരന്മാരും ഉണ്ടല്ലോ .. വിശേഷം വല്ലോം ഉണ്ടോ ? " കോട്ടമാങ്ങ

"വിശേഷം ഒണ്ട്.. എനിക്ക് നാലു മാസം , ലവന് ആറ്‌ മാസം.. തനിക്കും വേണോ വിശേഷം ? "

കൊളുത്ത് സനലിന്റെ ഓണ്‍ ദി സ്പോട്ട് മറുപടി കേട്ടു കലിപ്പായ കോട്ടമാങ്ങ , ഞങ്ങളൊക്കെ ജനിക്കും മുന്‍പേ മണ്മറഞ്ഞു പോയ ഏതോ തെറി ഒക്കെ വിളിച്ചു കൊണ്ടു വിട്ടുപോയി ..

സുനി എത്തി.. ഞങ്ങള്‍ അടുക്കളയിലേക്ക് ചെന്നു .. ചീഫ് ഷെഫ് മണിയുടെ കയ്യിലുള്ള റെസീപ്പി വച്ചു റോസ്റ്റ് പ്രിപറേഷന്‍ ആരംഭിച്ചു.. കാര്യങ്ങള്‍ കുഴപ്പമില്ലാതെ കടന്നു പോയി .. ബെയ്ക്കിംഗ് പൌഡര്‍ കൂട് പൊട്ടിക്കും വരെ.. കൂട് പൊട്ടിച്ചപ്പോള്‍ തന്നെ ഒരു മാതിരി കുത്തുന്ന ഫ്രാഗ്രന്‍സ് അവിടാകെ പരന്നു..

"ഡേയ് , ഇത് തന്നെയാണോഡേ ബെയ്ക്കിംഗ് പൌഡര്‍ " മണി

"പിന്നെ ഉറപ്പല്ലേ.. ചിലപ്പോ അതിന്റെ മണം ഇങ്ങനെയായിരിക്കും... ഉണ്ടാക്കി കഴിയുമ്പോ ഓകെ ആവും " - ടെറര്‍

കള്ളിന്റെ പുറത്തായത് കൊണ്ട് ആരും പിന്നെ കൂടുതല്‍ ഒന്നും ആലോചിച്ചില്ല .. മണി ആവശ്യത്തിനു ബെയ്ക്കിംഗ് പൌഡര്‍ എടുത്തു കലത്തിലേക്ക് ഇട്ടു..

പിന്നെ അവിടെ കണ്ടത് നിര്‍മയുടെ പരസ്യമാണ്.. ബക്കറ്റില്‍ പത നിറയുമ്പോള്‍ പരസ്യത്തിലെ ആന്റി സന്തോഷിക്കുന്നുണ്ടെങ്കിലും , കലത്തില്‍ പത പൊങ്ങുന്നത് കണ്ട് ഞങ്ങള്‍ ഞെട്ടി.. കള്ളിന്റെ സുഗന്ധത്തെ തോല്‍പ്പിച്ചു കൊണ്ട് പതയുടെ ഗന്ധം മൂക്ക് തുളച്ചു കയറുന്നു... പുക കൊണ്ട് കണ്ണ് നിറഞ്ഞു കരച്ചിലിന്റെ വക്കിലാണ് എല്ലാരും... ആകെ പ്രശ്നം !

മണി വേഗം തന്നെ അടുപ്പിലെ തീ കെടുത്തി, പ്ലാവിലയും കോലും കൊണ്ടു ഉണ്ടാക്കിയ കലംകോരി കൊണ്ട് പതയൊക്കെ എടുത്തു കളഞ്ഞു.. എല്ലാരും പന്തം കണ്ട പെരുച്ചാഴിയെപ്പോലെ നില്‍ക്കുവാണ്. വിശപ്പും ആര്‍ത്തിയും കൊണ്ട് കണ്ണ് കാണാന്‍ വയ്യ...

ചേമ്പിന്റെ ഒരു ഇല പറിച്ചു അതില്‍ ഡക്ക് റോസ്റ്റ് പകര്‍ത്തി.. ആര്‍ത്തി മൂത്ത എല്ലാരും അത് വലിച്ചു വാരി തിന്നു.. എന്തൊക്കെയോ ടേസ്റ്റ്... നാക്ക് ചൊറിയുന്നു... കണ്ണെരിയുന്നു !

"ഡേയ് , ഇത് പഴകിയ ബെയ്ക്കിംഗ് പൌഡര്‍ ആണ്.. പിള്ളാച്ചനെ തട്ടണം " പ്രതികാരത്തിന്റെ ടേസ്റ്റ് ഇങ്ങനെയായതില്‍ മനം നൊന്ത് ടെറര്‍ വീണ്ടും ആക്രോശ് !

എല്ലാവരും അത് ശരി വച്ചു .. ബാക്കിയുള്ള റോസ്റ്റ് ചിറയില്‍ തന്നെ ഒഴിച്ച് കളഞ്ഞു മണ്ണിട്ട്‌ മൂടി .. നേരെ പിള്ളാച്ചന്റെ കടയിലേക്ക് വച്ചു പിടിച്ചു !

"എടോ ഈ ബെയ്ക്കിംഗ് പൌഡര്‍നു തന്റെ പ്രായം ഉണ്ടോ ? " കവര്‍ പൊക്കിപ്പിടിച്ച് സജി പടക്കം പൊട്ടുന്ന സമണ്ടില്‍ ചോദിച്ചു..

"ഏതു ബെയ്കിംഗ് പൌഡര്‍ ? ഇവിടെ അങ്ങനെ ഒരു സാധനം വില്‍ക്കാന്‍ വച്ചിട്ടില്ലല്ലോ " പിള്ളാച്ചന്‍

"ആഹാ.. ഞങ്ങള്‍ കെയ്ക്ക് ഉണ്ടാക്കാന്‍ ഈ കോപ്പ് എടുത്തപ്പോള്‍ അതിനു ഒടുക്കത്തെ മണം.. താന്‍ നാട്ടുകാരെ കൊല്ലാനാണോ കട നടത്തുന്നത് ? "

താറാവിന്റെ കാര്യം പുറത്തു പറയാന്‍ പറ്റില്ലല്ലോ എന്നോര്‍ത്ത് ഞാന്‍ താറാവിനെ കെയ്ക്കാക്കി.. എന്റെ ആ ഡയലോഗ് എങ്ങനുണ്ട് എന്ന മട്ടില്‍ ഞാന്‍ എല്ലാരേം നോക്കിയപ്പോള്‍ ദാണ്ടേ 'ഏതു കെയ്ക്ക്' എന്ന മട്ടില്‍ മണി എന്നെയും നോക്കുന്നു ! ലവന്‍ ഈ രംഗം കൂടുതല്‍ വഷളാക്കുന്നതിനു മുന്പ് തന്നെ സജി കവര്‍ എടുത്തു അങ്ങേരുടെ മുന്‍പില്‍ കൊണ്ടു പോയി കാണിച്ചു..

കവര്‍ നോക്കി പിള്ളാച്ചന്‍ സ്വതവേ ഉറക്കെയുള്ള ചിരിയില്‍ ഒരു ആമ്പ്ലിഫയര്‍ കൂടി പിടിപ്പിച്ചു പൊട്ടിച്ചിരിച്ചു കൊണ്ടു പറഞ്ഞു..

"എടാ കണാപ്പന്മാരെ , ഇത് ബെയ്ക്കിംഗ് പൌഡര്‍ അല്ലേടാ , ബ്ലീച്ചിംഗ് പൌഡര്‍ ആണ് .. ഇത് കേയ്ക്കില്‍ ഇട്ടു തിന്നിട്ടുണ്ടേല്‍ ഇനി ഒരു മൂന്ന് നാലു ദിവസം നിന്റെയോന്നും ശല്യം ആര്‍ക്കും ഉണ്ടാവില്ല "

കര്‍ത്താവേ.. ചതിച്ചു !! ബെയ്ക്കിംഗ് പൌഡര്‍ ചോദിച്ച സുനിയുടെ കയ്യില്‍ ചെവിപ്പൊട്ടനായ ആ അലവലാതി പകരം കൊടുത്തു വിട്ടത് ബ്ലീച്ചിംഗ് പൌഡര്‍ ആണത്രേ !!

തന്നെ തന്നെ .. അത് തന്നെ . ടോയ്ലറ്റ് കഴുകാനും തൊഴുത്ത് ക്ലീന്‍ ചെയ്യാനും മാത്രം ഉപയോഗിക്കുന്ന അതേ സാധനം !

പിള്ളാച്ചനെ കൊല്ലാനുള്ള ദേഷ്യം ഉണ്ടായിരുന്നുവെങ്കിലും, ചെറുകുടലില്‍ നിന്നും വന്‍കുടലിലേക്കുള്ള ഹൈവേയില്‍ ഞങ്ങളെ കൊഞ്ഞനം കുത്തിക്കൊണ്ട് യാത്ര ചെയ്യുന്ന ആ ഡക്ക് ഞങ്ങളുടെ അവസ്ഥ കണ്ട് പൊട്ടിച്ചിരിച്ചു കൊണ്ട് 'ബ്ലീച്ചിംഗ് പൌഡര്‍ അതിന്റെ ജോലി ആരംഭിക്കാന്‍ പോകുന്നു' എന്ന മുന്നറിയിപ്പ് തന്നതോടെ ഞങ്ങള്‍ ആറ്‌ പേരും ആറ്‌ വഴിക്ക് ചിതറിയോടി വീട് പിടിച്ചു !

ഉള്ളത് പറയാലോ.. ബ്ലീച്ചിംഗ് പൌഡര്‍ ദേണ്ടെ ഒരു ഇച്ചിരി മതി....നല്ല എഫ്ഫക്റ്റ്‌ ആണ് .

രണ്ടു ദിവസത്തേക്ക് ഞങ്ങള്‍ ആരും പരസ്പ്പരം കണ്ടില്ല !!

ഏപ്രില്‍ ഫൂള്‍ എഡിഷന്‍

2010-04-01T11:46:00.000-07:00

U/A

Readers' discretion requested

ഇന്നത്തെ കാലത്ത് ഒരു ഏപ്രില്‍ ഫൂള്‍ പ്രോഗ്രാം ഭംഗിയായി നടത്താന്‍ എന്തെളുപ്പമാണ്‌.. നട്ടപ്പാതിരയ്ക്ക് ഏതെങ്കിലും ഒരു പബ്ലിക് കോയിന്‍ ബൂത്തില്‍ ചെല്ലുക , 101 കറക്കുക , എന്നിട്ട് പറയുക 'എംജീ റോഡിലെ കൊണാട്ട് പ്ലാസില്‍ ഉള്ള ഈഫല്‍ ടവറിന്റെ എഴുപത്തിനാലാം നിലയില്‍ വന്‍ തീപ്പിടുത്തം' എന്ന് !

മതി..ധാരാളം.. ഇനി പതുക്കെ മാറി നില്‍ക്കുക , ഷോ ആസ്വദിക്കുക ..

ഇല്ലാത്ത മണിയൊക്കെ ഒരു കണക്കിനു മുഴക്കി പറന്നു വരുന്ന ഫയര്‍ എന്‍ജിനുകള്‍ എംജി റോഡില്‍ ചെന്നു നോക്കുമ്പോള്‍ അതാ, തട്ടുകടയിലെ ജോസപ്പേട്ടന്‍ ബീഡി കത്തിക്കാന്‍ പോലും തീ കിട്ടാതെ അലയുന്ന കാഴ്ച കാണുന്നു.. മറ്റേ തീ വിളിച്ചറിയിച്ചവനെ തെറിയും പറഞ്ഞു ലവന്മാര് തിരിച്ചു പോകുന്നത് കണ്ടു മനസ്സില്‍ നാലു ഏപ്രില്‍ ഫൂളും പറഞ്ഞു വീട്ടില്‍ പോകുക.. എത്ര മനോഹരമായ ആചാരം..

എന്നാല്‍ ഇതല്ലായിരുന്നു അന്നത്തെ അവസ്ഥ.. ടെലഫോണ്‍ എന്ന് പറയുന്ന സാധനം നാട്ടില്‍ ഒരെണ്ണം പോലുമില്ല.. ഫയര്‍ (എഞ്ചിന്‍) പോയിട്ട് മുത്തുച്ചിപ്പി പോലും ഇറങ്ങാത്ത കാലം .. ഞങ്ങളുടെ ഏപ്രില്‍ഫൂള്‍ സ്പെഷ്യല്‍ എന്ന് പറയുന്നത് നെയിംബോര്‍ഡ് സ്വാപ്പിംഗ് എന്ന വെറും ചീളു കേസില്‍ ഒതുങ്ങിയിരുന്നു..

പക്ഷെ ആര്‍ക്കും ഉപദ്രവമില്ലാത്ത ഈ ചെറിയ കുസൃതികള്‍ നാട്ടുകാരും ആസ്വദിച്ചു പോന്നിരുന്നു !

വറുഗീസ് മാപ്പിളയുടെ ഇറച്ചിക്കടയുടെ ബോര്‍ഡ് എടുത്ത് രവിയണ്ണന്റെ ബാര്‍ബര്‍ ഷോപ്പിനു മുന്നില്‍ വച്ചു -- ഇറച്ചി വെട്ടും പോലെയുള്ള മുടി വെട്ടല്‍ ആയിരുന്നു തീം ... നാട്ടുകാര്‍ ചിരിച്ചു !

യാതൊരു നിയന്ത്രണവുമില്ലാതെ വംശപരമ്പര സൃഷ്ടിക്കുന്ന രാഘവന്‍ ചേട്ടന്റെ വീടിനു മുന്നില്‍ അവതാക്കുഞ്ഞിന്റെ പോള്‍ട്രീ ഫാമിന്റെ ബോര്‍ഡ് വച്ചു.. ജീമെയില്‍ സ്റ്റോറെയ്ജ് കപ്പാസിറ്റി കാണിക്കും പോലെ 'സ്റ്റില്‍ കൌണ്ടിംഗ്' -- അതായിരുന്നു തീം... നാട്ടുകാര്‍ ചിരിച്ചു !

എലിവിഷം വില്‍ക്കാനുണ്ട് എന്ന ബോര്‍ഡ് റേഷന്‍ കടയുടെ മുന്നില്‍ വച്ചു.. അരിയുടെ ക്വാളിറ്റി ആയിരുന്നു തീം.. പക്ഷെ നാട്ടുകാര്‍ ചിരിച്ചില്ല .. ഇതിനു പിന്നില്‍ ഞങ്ങളാണെന്ന് അറിയാവുന്ന ചിറ്റപ്പന്‍ പോലും അത് കണ്ടു വഴക്ക് പറഞ്ഞു.. "ഇതില്‍ എന്തുവാടാ ഇത്ര കോമഡി.. അതൊരു സത്യമല്ലേ" ? അതായിരുന്നു പുള്ളിയുടെ പ്രശ്നം !

ഞങ്ങളുടെ നാട്ടില്‍ ആദ്യമായി ഒരു സ്റ്റേഷനറിക്കട തുടങ്ങിയ അപ്പുവേട്ടന്‍ അതിനടുത്തു തന്നെ ചെരിപ്പുകള്‍ക്ക് വേണ്ടി തുടങ്ങിയ A/C (ആസ്ബസ്റ്റോസ് കണ്ടീഷണ്ട്) മുറിയുടെ മുന്നില്‍ ഒരു ബോര്‍ഡ് ഉണ്ടായിരുന്നു.. കട തുടങ്ങിയ ദിവസം മുതല്‍ എന്നും എപ്പോഴും അവിടെ തൂങ്ങിക്കിടന്നിരുന്ന ആ ബോര്‍ഡിലെ വാചകങ്ങള്‍ ഞങ്ങളെ എന്നും ആകര്‍ഷിച്ചുവിരുന്നെങ്കിലും ആ നാട്ടില്‍ ഞങ്ങളോട് സ്നേഹമുള്ള ഏക വ്യക്തി എന്ന നിലയിലും , അവിടുന്ന് വല്ലപ്പോഴും ഫ്രീ ആയി കിട്ടാറുള്ള സിപ്-അപ്പിന്റെ നന്ദി മനസ്സില്‍ ഉള്ളതിനാലും ആ ബോര്‍ഡിന്റെ അഭംഗി ഞങ്ങള്‍ അപ്പുവേട്ടനോട് പറഞ്ഞിരുന്നില്ല .. പക്ഷെ , ഈ സംഭവത്തിലെ നായകന്‍ ആവാന്‍ പോകുന്ന ആ ബോര്‍ഡ് എപ്പോള്‍ കണ്ടാലും ഞങ്ങള്‍ അറിയാണ്ട് ചിരിച്ചു പോയിട്ടുണ്ട്..

എനിവേയ്സ്.... മാര്‍ച്ച്‌ 31 !! അതായിരുന്നു ആ ദിവസം.. അടുത്ത ദിവസം ആര്‍ക്കിട്ടെങ്കിലും ഒരു പണി കൊടുക്കണം എന്ന ചിന്ത എല്ലാ വര്‍ഷവും ഞങ്ങളെ അലട്ടുന്ന ഒരു വലിയ പ്രശ്നമായിരുന്നു.. ആല്‍ത്തറ ബ്രദേര്‍സ് ആയതിനു വളരെ ശേഷമുള്ള ഒരു വിഡ്ഢിദിനത്തലേന്നു ഞങ്ങള്‍ വീണ്ടും ചിന്തന്‍ ബൈട്ടക്കിനു ഇരുന്നു !

ഇനി അല്‍പ്പം ഫ്ലാഷ് ബാക്ക് !

ആയിടയ്ക്കാണ് അക്കരെ നിന്നും ഗള്‍ഫ് പാച്ചുവേട്ടന്റെ ഭാര്യ വിലാസിനി ഞങ്ങളുടെ നാട്ടില്‍ ചിട്ടിക്കമ്പനിയും സ്വര്‍ണപ്പണയവും നടത്താന്‍ വന്നത്. ഞങ്ങടെ റഡാറിന്റെ റേഞ്ച് അക്കര വരെ ചെന്നിരുന്നതിനാല്‍ , ആയമ്മ ചെറിയൊരു വശപ്പിശകായിരുന്നു എന്നുള്ള കാര്യം ഞങ്ങള്‍ക്ക് നേരത്തേ അറിയാമായിരുന്നു.. ഞങ്ങടെ നാട്ടിലെ പഞ്ചായത്ത് മെമ്പര്‍ നാറാണന്‍കുട്ടി ആയിരുന്നു ആയമ്മയുടെ ഇവിടുത്തെ ഡ്രൈവര്‍ .. ആണുങ്ങളെ ചിരിച്ചു കാണിച്ചു വശത്താക്കി ചിട്ടിയില്‍ ചേര്‍ക്കുന്ന വിലാസിനിക്കെതിരെ നാട്ടിലെ പെണ്‍പട രഹസ്യ യോഗങ്ങള്‍ തുടങ്ങിയിരുന്നുവെങ്കിലും മെമ്പര്‍ നാറാണന്‍കുട്ടിയുടെ ബലത്തില്‍ (ആ ബലമല്ല !) ആയിരുന്നു ആയമ്മ അവിടെ വിലസിയിരുന്നത് ! ഉള്ളത് പറയാലോ.. ആയമ്മ നല്ല ഡമാറു ഐറ്റം ആയിരുന്നു !!

മറ്റു പലരെയും പോലെ തന്നെ ഞങ്ങളുടെ ഗാങ്ങിനെ ആയമ്മയ്ക്കും നല്ല കലിയായിരുന്നു.. നാട്ടിലെ തിളയ്ക്കുന്ന യൌവ്വനം ആയിരുന്നല്ലോ ഞങ്ങള്‍ .. അനീതിയും അക്രമവും കണ്ടാല്‍ എവിടെയും ഞങ്ങള്‍ പറന്നു ചെല്ലുമായിരുന്നു.. (വേണ്ടാ വേണ്ടാ.... അനീതി, അക്രമം എന്നൊന്നും ആരും പെണ്‍പിള്ളേര്‍ക്ക് പേരിടാറില്ല.. ഇത് ഒറിജിനല്‍ തന്നെട്ടാ ..)

വിലാസിനിയുടെ ലീലാവിലാസങ്ങള്‍ ഞങ്ങള്‍ക്കും ഞങ്ങളുടെ കയ്യിലിരിപ്പ് അവര്‍ക്കും പിടിക്കാണ്ടിരിക്കണ ടൈം !

അങ്ങനെയിരിക്കെ, ഒരു മാല പണയം വയ്ക്കാന്‍ സനല്‍ വിലാസിനിയുടെ അടുത്ത് ചെന്നെങ്കിലും പണയം വച്ച മാലയുടെ പകുതിക്കാശു പോലും വിലാസിനി കൊടുത്തില്ല .. ഇത്രെയും കാശേ തരാന്‍ ഒക്കത്തുള്ളൂ എന്ന് വിലാസിനി പറഞ്ഞപ്പോള്‍ , "ഞാന്‍ ആയതു കൊണ്ടല്ലേ ഇത്രയും , നാറാണന്‍ ചേട്ടനായിരുന്നെങ്കില്‍ വിലാസിനി കൂട്ടിക്കൊടുക്കില്ലായിരുന്നോ" എന്നൊരു നിഷ്ക്കളങ്കമായ ചോദ്യം ചോദിച്ച സനലിനോട് "പ്ഫാ പട്ടീ , കൂട്ടിക്കൊടുപ്പ് നിന്റെ മറ്റവളുടെ തൊഴിലാടാ " എന്ന് മറുപടി പറഞ്ഞതോടെ വിലാസിനി ഞങ്ങളുടെ വര്‍ഗശത്രുവായി പ്രഖ്യാപിക്കപ്പെട്ടു !

ഫ്ലാഷ് ബാക്ക് കഴിഞ്ഞു.. വീണ്ടും മാര്‍ച്ച്‌ 31

ഇത്തവണ പണി വിലാസിനിയ്ക്കിട്ടു തന്നെ കൊടുക്കണം എന്ന് തീരുമാനിച്ചു.. ആയമ്മയുടെ ചിട്ടിക്കമ്പനിക്കും ഉണ്ടായിരുന്നു ഒരു നെയിം ബോര്‍ഡ്.. കറുത്ത ബോര്‍ഡില്‍ നല്ല മുഴുത്ത വെളുത്ത (അതെ .. മുഴുത്തു വെളുത്തു തുടുത്തു തന്നെ) അക്ഷരത്തില്‍ .....

വിലാസിനി ചിട്ടീസ്

പ്രൊപ്രൈറ്റര്‍ : പടിയ്ക്കകം വിലാസിനി

"അളിയാ , ഈ ബോര്‍ഡ് കണ്ടിട്ട് എന്തേലും തോന്നുന്നുണ്ടാ ? " ടെറര്‍ സുനി ചോദിച്ചു

"ബോര്‍ഡ് ഒക്കെ കണ്ടു എന്ത് തോന്നാന്‍ .. ലവരെ കാണുമ്പോള്‍ പലതും തോന്നാറുണ്ട് " സജിയുടെ കണ്ണുകളില്‍ ലത്‌ കെടന്നു വെട്ടിത്തിളങ്ങുന്നു !

എന്നാല്‍ സുനിയുടെ ബുദ്ധിയില്‍ അത് കത്തിക്കഴിഞ്ഞിരുന്നു.. അവന്‍ അത് ആവേശത്തോടെ ഞങ്ങളുമായി പങ്കു വച്ചു.. എല്ലാര്ക്കും കത്തിബോധിച്ചു.. പിന്നെല്ലാം പട പടാന്നായിരുന്നു .. പാതിരാത്രി തന്നെ അപ്പുവേട്ടന്റെ ചെരുപ്പ് കടയില്‍ നിന്നും ബോര്‍ഡ് പൊക്കി.. കുറച്ചു ചിരട്ടക്കരിയും സംഘടിപ്പിച്ചു നേരെ വിലാസിനിയുടെ ഓഫീസ് ലക്ഷ്യമാക്കി നടന്നു ..ലോഡിംഗ് അണ്‍ലോഡിംഗ് ഒക്കെ വേഗം കഴിഞ്ഞു.. കരി കൊണ്ടു മിനുക്ക്‌ പണികളും നടത്തി..

എല്ലാവരും ഹാപ്പിയായി കിടന്നുറങ്ങി..

ഏപ്രില്‍ 1 . വീട്ടില്‍ അമ്മയും ഇളയമ്മയും വിലാസിനിയുടെ പേരും പറഞ്ഞു ചിരിക്കുന്നത് കേട്ടപ്പോള്‍ തന്നെ മനസിലായി.. സംഭവം എല്ലാരും അറിഞ്ഞു കഴിഞ്ഞു.. നാട്ടിലെ മീന്‍കാരി , ബിബിസി കാര്‍ത്ത്യായനി ആയിരിക്കണം സോഴ്സ്..

എന്തായാലും ഞങ്ങളുടെ പണി വിലാസിനിക്ക്‌ നന്നായി ഏറ്റു.. കുറച്ചു നാള്‍ നാട്ടുകാര്‍ക്ക് ഓര്‍ത്തു ചിരിക്കാന്‍ ഒരു വകയുമായി !

വിലാസിനി ചിട്ടീസ് - ആ ഭാഗം അപ്പുവേട്ടന്റെ ചെരിപ്പ് വില്‍പ്പനയുടെ പരസ്യ ബോര്‍ഡ് കൊണ്ട് അതേപടി വച്ചു മറച്ചു !

പ്രൊപ്രൈറ്റര്‍ : പടിയ്ക്കകം വിലാസിനി - അവിടെ കരികൊണ്ട് ചില പ്രയോഗങ്ങള്‍ നടത്തി..

റിസള്‍ട്ട്‌ ഇങ്ങനെയായിരുന്നു

വമ്പിച്ച ചപ്പല്‍ മേള ഇവിടെ !

പ്രൊപ്രൈറ്റര്‍ : പടക്കം വിലാസിനി

ലിഫ്റ്റടി വാസു !

2010-03-26T12:46:00.000-07:00

ലിഫ്റ്റ്‌ വാസു !

NIFE-യില്‍ പോയി ലിഫ്റ്റ്‌ ടെക്നീഷ്യന്‍ കോഴ്സ് പഠിച്ചത് കൊണ്ടല്ല വാസുവണ്ണന്‍ ആ പേര് സമ്പാദിച്ചത്.. മറിച് , വഴിയ്ല്‍ കാണുന്ന പട്ടിയോടും പൂച്ചയോടും വരെ ലിഫ്റ്റ്‌ ചോദിച്ചു യാത്ര ചെയ്തു ഡെസ്റ്റിനേഷനില്‍ എത്തുക എന്ന സ്ട്ട്രാട്ടജി വളരെ ഭംഗിയായി എക്സിക്യൂട്ട് ചെയ്തു ജീവിക്കുന്നത് കൊണ്ടു വീണ പേരാണ്.

നാട്ടിലെ ഔദ്യോഗിക വാഹനമായ സൈക്കിള്‍ പുള്ളി സ്വന്തമായി വാങ്ങിയിട്ടില്ല. ആരെങ്കിലും സൈക്കിളിലോ സ്കൂട്ടറിലോ പോകുമ്പോള്‍ അവരുടെ ലിഫ്റ്റ്‌ ചോദിച്ചു കൂടെ കയറും.. എന്നിട്ട് 'ദേ ഇച്ചിരി വലത്തോട്ട്', 'ഒരല്‍പം ഇടത്തോട്ട്' , 'ആ തൊണ്ടിന്റെ അറ്റത്ത്‌' എന്നൊക്കെ പറഞ്ഞു വണ്ടി ഓടിക്കുന്നവന്റെ റൂട്ട് മുഴുവന്‍ മാറ്റി തനിക്ക് ആവശ്യമുള്ളിടത്ത് എത്തിക്കാന്‍ ഉള്ള കോഴ്സില്‍ വാസുവണ്ണന് ഡോക്ടറെയ്റ്റ് ഉണ്ട്.

എന്നിട്ടോ , അവിടെ എത്തിക്കഴിഞ്ഞാല്‍ പിന്നെ ബൈ ബൈ എന്ന് പറഞ്ഞ് ഒറ്റ പോക്കാണ്.... ആള് സാമാന്യം നല്ല ഫ്രോഡും ആണ്.. ആര്‍ക്കിട്ടെങ്കിലും പണി കിട്ടുന്നത് കാണാന്‍ പെരുത്ത്‌ സന്തോഷമാണ് പുള്ളിക്ക്..

ബ്രെയ്ക്ക് ബൈജു !
വലിയ ബ്രെയ്ക്ക് ഡാന്‍സ്കാരനാണ്.. കൊഞ്ചു നിവര്‍ന്നു നിന്നത് പോലെയാണ് രൂപം.. ഫോട്ടോ ഫ്രെയിം ചെയ്യാന്‍ പറ്റാത്ത രീതിയില്‍ ഉന്തി നില്‍ക്കുന്ന രണ്ടു മുയല്‍പ്പല്ലുകള്‍ ആണ് പുള്ളിയുടെ അടയാളം . പളപളാ മിന്നുന്ന ഷര്‍ട്ടും പാന്റ്സും വേഷം.. വെയിലത്ത്‌ ബൈജു ഇറങ്ങി നടക്കുന്ന കാഴ്ച കണ്ടു പലരുടെയും കണ്ണുകള്‍ മഞ്ഞളിച്ചും നീലളിച്ചും ചുമന്നളിച്ചും ഒക്കെ പോയിട്ടുണ്ട്..

ചെര്‍പ്പില്‍ക്കാവിലെ ഉത്സവത്തിന്‌ ബ്രെയ്ക്കിനിറെ ഒരു ഡാന്‍സ് ഇല്ലെങ്കില്‍ ഭഗവതി പിണങ്ങും എന്നാണു പ്രശ്നം വയ്ക്കല്‍ നടത്തുന്ന മാധവക്കണിയാന്‍ പറഞ്ഞിട്ടുള്ളത് പോലും ! ഭഗവതി പിണങ്ങാണ്ടിരിക്കാന്‍ ഉത്സവ സീസണ്‍ ആകുമ്പോഴേക്കും ബൈജു ആരുടെയെങ്കിലും കാലു പിടിച്ചു അവിടെ ഒരു ഡാന്‍സ് പ്രോഗ്രാം നടത്തിയിരിക്കും !

പക്ഷെ ഉള്ളത് പറയാലോ , ആ നാട്ടില്‍ എന്നെക്കാള്‍ ശുദ്ധനായ ഒരാള്‍ ഉണ്ടെങ്കില്‍ അത് ബൈജുവാണ്.. പഞ്ചപാവം.. പരസഹായി .. ആരെയും ദ്രോഹിക്കുന്ന കാര്യം ചിന്തിക്കാന്‍ പോലും വയ്യ..

ഒറ്റ പ്രശ്നമേയുള്ളൂ.. എന്തെങ്കിലും ചോദിച്ചാല്‍ ആദ്യം ഒരു തറുതല അല്ലെങ്കില്‍ തര്‍ക്കുത്തരം.. അതായിരിക്കും ബൈജുവിന്റെ നാക്കില്‍ നിന്നും ആദ്യം ചാടുക.. പിന്നെ ആ രണ്ടു പല്ലുകള്‍ കാണിച്ചു ഒരു ചിരിയും..

ബൈജുവിനോളം ഫേമസ് ആണ് പുള്ളിയുടെ സ്കൂട്ടറും.. സര്‍ക്കസ്സുകാരുടെ വണ്ടി മാതിരി ഒരു നാലഞ്ചു കളര്‍ പെയിന്റ് ഒക്കെ അടിച്ച ഒരു പഴയ പന്നാസ് ലാമ്പി ! ബൈജുവിനാണെന്കില്‍ വണ്ടി എപ്പോ ഓടിച്ചാലും ആരെയെങ്കിലും അതില്‍ കയറ്റണം .. കയറ്റിയെ അടങ്ങൂ.. എന്നിട്ട് ബ്രെയ്ക്ക് ഡാന്സിനെക്കുറിച്ചും ലാമ്പി സകൂട്ടറെക്കുറിച്ചും എഴുതി തയ്യാറാക്കിയത് പോലെ ഒരു പ്രസംഗം തന്നെ നടത്തും !

അങ്ങനെ ഒരു ഞായറാഴ്ച വൈകുന്നേരം രണ്ടു ചെറുതൊക്കെ അടിച്ചു മിനുങ്ങി തന്റെ ലാംബിയും എടുത്തു നാട് ചുറ്റാനിറങ്ങിയ ബൈജു ചെന്നു പെട്ടത് ആരെയെങ്കിലും സീസി വയ്ക്കാന്‍ നോക്കി കവലയില്‍ നില്‍ക്കുന്ന വാസുവണ്ണന്റെ മുന്നില്‍ ..

വിരുദ്ധധ്രുവങ്ങള്‍ ആകര്‍ഷിക്കപ്പെടും എന്നാണല്ലോ..

രണ്ടു പേരും ഹാപ്പി ! തേടിയ വള്ളി കാലില്‍ ചുറ്റി എന്ന് രണ്ടു പേരും വിചാരിച്ചു.. ടൌണ്‍ ആണ് വാസുവണ്ണന്റെ ലക്‌ഷ്യം ! ചക്കയുടെ മൂട്ടില്‍ അണ്ണാന്‍ ഇരിക്കുന്ന മാതിരി രണ്ടു പേരും കൂടിയുള്ള ആ യാത്ര തുടങ്ങി..

ഇരുട്ട് വീണു തുടങ്ങിയിരുന്നു.. ടൌണ്‍ന് അടുത്തുള്ള വളവു തിരിഞ്ഞതും ബൈജു ഞെട്ടി.. മുന്‍പില്‍ ജീപ്പുമായി ഇര തേടി നില്‍ക്കുന്നു.... സാക്ഷാല്‍ സുഗതന്‍ എസ് ഐ !! മാന്‍പേടയെ കണ്ട സിംഹത്തെപ്പോലെ സുഗതന്‍ എസ് ഐ സന്തോഷം കൊണ്ടു മതിമറന്നു കൈ ഒക്കെ തിരുമ്മിത്തുടങ്ങി..

ബ്രെയ്ക്ക്(ബൈജു) ബ്രെയ്ക്ക്(വണ്ടിയുടെ) പിടിച്ചതും വണ്ടി നിയന്ത്രണം വിട്ട വാണം മാതിരി വളഞ്ഞു പുളഞ്ഞു ഒരു വിധം ജീപ്പില്‍ തട്ടി തട്ടിയില്ല എന്ന മട്ടില്‍ നിന്നു !

"ഇങ്ങോട്ടിറങ്ങെടാ... ശരിക്കൊന്നു കാണട്ട് " സുഗതന്‍ എസ് ഐ ....

ബൈജു ആകെ പരവേശത്തോടെ ഇറങ്ങി. ബൈജുവിനെ പൊക്കിയത് കണ്ടു വാസുവണ്ണനു സന്തോഷം കൊണ്ട് നില്‍ക്കാന്‍ വയ്യാതായെങ്കിലും അവിടെ ഇരിക്കാന്‍ കസേര ഒന്നും ഇല്ലാഞ്ഞത് കൊണ്ട് ബൈജുവിന്റെ തൊട്ടു പിറകില്‍ പതുക്കെ കയ്യും കെട്ടി നിന്നു.. ഇന്ന് അടിയുടെ പൂരം കാണാം എന്ന് മനസ്സിലും വിചാരിച്ചു..

കാലിയായ മീന്‍കൊട്ടയുടെ അരികില്‍ പൂച്ച മണത്തു നടക്കും പോലെ സുഗതന്‍ എസ് ഐ ബൈജുവിന്റെ മുഖത്തിന്‌ ചുറ്റും തന്റെ മൂക്ക് കൊണ്ട് 'ഇക്ഷ' വരച്ചു !

"വെള്ളമാടിച്ചാണോടാ വണ്ടി ഓടിക്കണത് ? " സുഗതന്‍ എസ് ഐ ..

"പെട്രോള്‍ അടിച്ചാണ് സാര്‍ വണ്ടി ഓടിക്കുന്നത്" - മാനുഫാക്ച്ചറിംഗ് ഡിഫെക്റ്റ് പോലെ എന്നും തന്റെ കൂടെയുള്ള തര്‍ക്കുത്തരം ബൈജു പോലും അറിയാണ്ട് പുറത്തു ചാടി !!!!

വാസുവണ്ണന്‍ ആഹ്ലാദം കൊണ്ടു വീര്‍പ്പു മുട്ടി.. ചിരി അമര്‍ത്തിപ്പിടിച്ചു പിന്നില്‍ നിന്നു.. ആഹാ ഇപ്പോള്‍ കാണാം സീന്‍ എന്ന് മസ്സില്‍ മന്ത്രിച്ചു

പറഞ്ഞു കഴിഞ്ഞ നിമിഷത്തില്‍ തന്നെ ബൈജു അബദ്ധം മനസിലാക്കിക്കഴിഞ്ഞിരുന്നു.. പക്ഷെ ഒരുപാട് വൈകിപ്പോയിരുന്നു !!!

"കഴുവേര്‍ട മോനെ" എന്ന ആ ആക്രോശം കോളാമ്പി മൈക്കില്‍ കൂടി കേള്‍ക്കുന്ന പോലെ അവിടെ പ്രകമ്പനം കൊണ്ടു ...

സുഗതന്‍ എസ് ഐ പേറ്റന്റ് എടുത്ത ഒരു സ്റ്റൈല്‍ ആണ് അടുത്തതായി അവിടെ അരങ്ങേറിയത് !

ഒളിമ്പിക്സിനു ഡിസ്ക്കസ് ത്രോ താരം കയ്യിലുള്ള ആ പാട്ട എറിയാന്‍ വേണ്ടി ആക്ഷന്‍ എടുക്കുന്നത് പോലെ സുഗതന്‍ എസ് ഐ വലത്തേ കൈ പിന്നിലേക്ക് വലിച്ചു.. കാല്‍ മുട്ടുകള്‍ അല്‍പ്പം മടക്കി .. കണ്ണുകള്‍ ഇറുക്കിയടച്ചു..

പത്തല് പോലത്തെ ആ കൈ മുന്നിലേക്ക് വീശിയെടുത്തതും, പറഞ്ഞ തെറ്റ് മനസിലാക്കിയ ബ്രെയ്ക്ക് ബൈജു പുഴു ചുരുണ്ട് വീഴും പോലെ സുഗതന്‍ എസ് ഐ യുടെ കാലിലേക്ക് വീണതും ഒരുമിച്ചായിരുന്നു..

"ട്ടപ്പേ" !!!!!

പടക്കം പൊട്ടുന്ന മാതിരി ശബ്ദം.. ചുണ്ണാമ്പ് കയ്യില്‍ തേച്ചത് പോലെ സുഗതന്‍ എസ് ഐ യുടെ കൈ നീറിപ്പുകഞ്ഞു..

അടിയുടെ ആഘാതത്തില്‍ കണ്ണടച്ച് പോയ എസ് ഐ കണ്ണ് തുറന്നു.. നേരെ മുന്നില്‍ ആരും ഇല്ല .. !! ഒറ്റയടിക്ക് ഇവന്മാര്‍ ആവിയായോ എന്ന ചോദ്യഭാവത്തില്‍ സുഗതന്‍ എസ് ഐ ....

കാലില്‍ പൂച്ച ഉരുമുന്ന പോലെ ഒരു അനക്കം.. എസ് ഐ നോക്കിയപ്പോള്‍ ബൈജു കാലില്‍ ഇത്തിക്കണ്ണി പടര്‍ന്നപോലെ കെട്ടിപ്പിണഞ്ഞു കിടപ്പാണ്..

അടിയുടെ മാസ്മരിക ശബ്ദം കേട്ട് നിലത്തു ഇഴയുന്ന ബൈജു പിന്നിലേക്ക് തിരിഞ്ഞു നോക്കിയപ്പോള്‍ കണ്ട കാഴ്ച ...........

കൈകള്‍ രണ്ടും കുരിശില്‍ തറച്ച പോലെ വച്ചു വാസുവണ്ണന്‍ നിന്നു കറങ്ങുന്നു !!!

ഭൂമി പോലും സാങ്കല്‍പ്പിക അച്ചുതണ്ടില്‍ കറങ്ങിയിരുന്ന ആ കാലത്ത് വാസുവണ്ണന്‍ തന്റെ സ്വന്തം ഒറിജിനല്‍ തണ്ടില്‍ ഒരു നാലര വട്ടം സ്ലോമോഷനില്‍ കറങ്ങി മൂക്കും കുത്തി താഴെ വീണു !!!!

ഇപ്പൊ സംഭവത്തിന്റെ ഏകദേശം മുക്കും മൂലയും ബ്രേയ്ക്കിനു പിടികിട്ടി .. താന്‍ കാലു പിടിക്കാന്‍ വീണപ്പോള്‍ പറ്റിയതാണ്.. സുഗതന്‍ എസ് ഐ യുടെ അടി നല്ല വൃത്തിയും വെടിപ്പുമായി മാറിക്കൊണ്ടു...

ബൈജുവിന്റെ പതനത്തില്‍ മതിമറന്നു നിന്ന വാസുവണ്ണന്‍ തന്റെ നേര്‍ക്ക്‌ വന്ന ആ എസ് ഐ കൈ കണ്ടു പോലുമില്ല ..

അബദ്ധം പറ്റിയത് പ്രമാണിച് സുഗതന്‍ എസ് ഐ യും സംഘവും ഉടന്‍ തന്നെ രണ്ടിനേം അവിടെ വിട്ടിട്ട് അടുത്ത ലൊക്കേഷന്‍ തപ്പിപ്പോയി ! പാവം ബൈജു വാസുവണ്ണനെ എഴുന്നേല്‍പ്പിക്കാന്‍ പാഴ്ശ്രമവും തുടങ്ങി..

ബോധം തെളിയാന്‍ ഒന്നര മണിക്കൂര്‍ എടുത്തത്രേ ... .. !!

* * * *

നാലു ദിവസത്തേക്ക് വാസുവണ്ണനെ ആരും വീടിനു പുറത്തു കണ്ടില്ല..

അഞ്ചാം ദിവസം - സ്വന്തം സൈക്കിള്‍ ഓടിച്ചു നാട്ടിലൂടെ പോകുന്ന ലിഫ്റ്റ്‌ വാസുവിന് നാട്ടുകാര്‍ ചെറിയ മാറ്റത്തോട് കൂടിയ പുതിയ പേരിട്ടു

ലിഫ്റ്റടി വാസു ! എന്നുവച്ചാല്‍ 'ലിഫ്റ്റ്‌ പോയി അടി കൊണ്ടവന്‍ വാസു ' ! എന്ന്

* ദി സഹോദരന്മാര്‍ *

2010-03-19T12:21:00.000-07:00

ഊട്ടുപുര സംഭവത്തിനൊക്കെ ഒരുപാട് മുന്പ് നടന്ന ഈ കാര്യം ഇപ്പോള്‍ ഓര്‍ക്കാന്‍ കാരണമുണ്ട് ..

അമിതാബ് ബച്ചന്‍ !

ഞെട്ടരുത് !!!!!!!!!!!!

അങ്ങേരു ഞങ്ങളുടെ കൂട്ടുകാരന്‍ ആയിരുന്നു - എന്നൊന്നും അല്ല പറയാന്‍ പോകുന്നത്

ഇന്നിപ്പോ കേരളത്തിന്റെ ടൂറിസം അംബാസഡര്‍ അമിതാബ് ബച്ച്ചച്ചന്‍ കൊച്ചച്ചന്‍ എന്നൊക്കെ പറയും പോലെ അന്നും ഉണ്ടായിരുന്നു ഈ ബ്രാന്ടിംഗ് എന്ന സംഗതി..

അതായത് ഇപ്പൊ ഒരു ഗാംഗ് ഉണ്ടെന്നു വിചാരിക്കുക.. അത് ഒരു ഗാംഗ് ആകണമെങ്കില്‍ അതിനു പൊളപ്പന്‍ ഒരു പേര് വേണം.. പേരില്ലാത്ത ഗാങ്ങിനു ആളുകള്‍ , കൂടുതലും ഗേള്‍സ്‌ , ചാവാലിപ്പട്ടിയുടെ വില പോലും കൊടുത്തിരുന്നില്ല..
അന്നത്തെ പേരുകള്‍ ഒക്കെ ഏകദേശം ഇപ്പ്രകാരമാണ് - 'സ്റ്റാര്‍ ഫ്രെണ്ട്സ് ' , 'മിന്നല്‍ ബ്രദേര്‍സ്' , 'ചൂള ദോസ്ത് സ്' ..

മീന്‍സ്, എന്ത് കൂതറ പേരാണെങ്കിലും അവസാനം എല്ലാത്തിലും ഫ്രെണ്ട്സ് എന്നോ , ബ്രദേര്‍സ് എന്നോ , ദോസ്ത് എന്നോ ഒക്കെ തിരുകികയറ്റണം.. എന്നാലെ ലതിനു ഒരു ലിത് വരികയുള്ളൂ ... അതായിരുന്നു അന്നത്തെ ട്രെന്‍ഡ് !

ഈ സത്യങ്ങളൊക്കെ മനസിലാക്കിയ ഞങ്ങളും തീരുമാനിച്ചു.. ഞങ്ങളുടെ ഗാങ്ങിനും ഒരു പേരിടണം.. ആരു കണ്ടാലും ഇമ്പം തോന്നുന്ന , സ്നേഹം തോന്നുന്ന , എന്നാല്‍ ചെറുതായിട്ട് ഒന്ന് കിടുങ്ങുന്ന ഒരു പേര് ! ഞങ്ങള്‍ കുലങ്കുഷമായി വല്ലപ്പോഴും മാത്രം സംഭവിക്കുന്ന ആ പ്രക്രിയ (ആലോചന) തുടങ്ങി..

ആസ് യൂഷ്വല്‍ , ആല്‍ത്തറയില്‍ ഇരുന്നാണ് ആലോചന.. അമ്പലത്തില്‍ വരുന്ന ഗേള്‍സിനെ പോലും ശ്രദ്ധിക്കാതെ ആലോചന തുടര്‍ന്നു.. പലരും അവരവര്‍ക്ക് കിട്ടിയ പേരുകള്‍ വിളമ്പി ... 'ഇഷ്ട്ടികക്കളം ഫ്രെന്‍സ്', 'പാടം ബ്രദേര്‍സ്', 'ബ്ലൂസ്റ്റാര്‍ ടീം' അങ്ങനെ മലയാളവും ഇംഗ്ലീഷും മിക്സും ഒക്കെ ആയി ഒരുപാട് തൊട്ടി-കച്ചറ പേരുകള്‍ വന്നു.. പക്ഷെ ഒന്നും സമവായം കാണുന്നില്ല.. ഒടുവില്‍ എന്നത്തേയും പോലെ ഞാന്‍ തന്നെ ഇടപെട്ടു..

"നമ്മള്‍ ഈ ആല്‍ത്തറയുടെ ചുവട്ടില്‍ ഇത്രേം നേരം ഇരുന്നിട്ടും ഇതിന്റെ പേര് ഇടാന്‍ തോന്നിയില്ലല്ലോ.. ഗാങ്ങിന്റെ പേര് നമുക്ക് 'ആല്‍ത്തറ ബ്രദേര്‍സ്' എന്നാക്കാം.. എന്തേ ? "
പുന്നെല്ലു കണ്ട എലിയെക്കൂട്ട് അവന്മാരൊക്കെ അത്ഭുതപരതന്ത്രരായി കണ്ണ് മിഴിച്ചു.. എന്നെ ഭയങ്കര ആരാധനയോട് കൂടി ഒക്കെ നോക്കി.. ഞാനങ്ങു പൊങ്ങി പൊങ്ങി കവുങ്ങില്‍ ഇടിക്കണ സ്റ്റേജ് ആയി !
എന്തായാലും ആ പേര് തന്നെ തീരുമാനിച്ചു - ആല്‍ത്തറ ബ്രദേര്‍സ്

പേര് ഇട്ടിട്ട് മാത്രം കാര്യമില്ല .. ഇനിയാണ് മാര്‍ക്കറ്റിംഗ് വേണ്ടത്.. ഞങ്ങളാണ് ഈ സഹോദരന്മാര്‍എന്ന് സ്കൂളില്‍ ഒക്കെ എങ്ങിനേം അറിയിക്കണം.. ഗേള്‍സ്‌ ഒക്കെ അറിഞ്ഞാലേ ഒരു ഗും ഉണ്ടാവുള്ളൂ .. അതിനുള്ള വഴി ആലോചിച്ചു തുടങ്ങി..

ഒരു പാവം പിടിച്ച സര്‍ക്കാര്‍ ഉസ്കൂളാണ് ഞങ്ങളുടേത്.. അലമ്പിന്റെ കൂത്തരങ്ങാണ് സ്ഥലം ! അവിടെ എട്ടാം ക്ലാസ്സില്‍ കയറാനുള്ള യോഗ്യത എന്ന് പറയുന്നത് വേറെ ഒന്നുമല്ല , പട്ടയടി ആണ്... ഞങ്ങളുടെ കൂട്ടത്തിലുള്ള പലരും ആ ഒറ്റ ക്വാളിഫികേഷന്‍ കൊണ്ടു മാത്രമാണ് അവിടെ കയറിക്കൂടിയത്.. ഹൈസ്കൂളിലെ പിള്ളേരൊക്കെ ഹറാംപെറപ്പിന്റെ യൂണിവേഴ്സിറ്റികള്‍ !!

ഇങ്ങനത്തെ ഗാങ്ങുകള്‍ അവിടെ പ്രത്യക്ഷപ്പെടുന്നതിനു മുന്നോടിയായി വലിയ ഒരു പോസ്റ്റര്‍ ഒക്കെ ഇറക്കും.. ഇന്ന ഇന്ന പയ്യന്മാര്‍ ചേര്‍ന്ന് - ഇതാ വരുന്നു 'ചാട്ടുള്ളി ബ്രദേര്‍സ്' അല്ലെങ്കില്‍ 'ഡെവിള്‍ ബ്രദേര്‍സ് ' എന്നൊക്കെ പറഞ്ഞുള്ള അറിയിപ്പുകള്‍ .. ഇംഗ്ലീഷ് എഴുതി ഒപ്പിക്കാന്‍ പറ്റുന്ന ചുരുക്കം ചിലര്‍ ഈ പേരുകള്‍ മാത്രം ഇംഗ്ലീഷില്‍ ആയിരിക്കും എഴുതുക.. അതിനാണ് കൂടുതല്‍ ഗും !! ഈ പോസ്റ്റര്‍ സ്കൂളിന്റെ പിന്നിലത്തെ മതിലിലും , ഗേള്‍സ്‌ ടോയ്ലെറ്റിന്റെ പുറംചുമരിലും ഒക്കെ ഒട്ടിച്ചു വയ്ക്കും.. അതാണ്‌ മാര്‍ക്കറ്റിംഗ് ടെക്നിക്സ് !!

രാത്രി ആണ് ഇതൊക്കെ ചെയ്യേണ്ടത്.. രാവിലെ പിള്ളേര്‍ ഒക്കെ വരുമ്പോള്‍ തന്നെ സംഭവം കാണണമല്ലോ..

വെറും അലവലാതിയായ ഒരു പ്യൂണ്‍ ഉണ്ട്.. പുള്ളി വീട്ടില്‍ പോകുമ്പോള്‍ എട്ടു മണി കഴിയും.. അന്നൊക്കെ ഞങ്ങളെ അധികം പേരെയും രാത്രി ഒന്നും വീടിനു വെളിയില്‍ വിടാറില്ല.. അപ്പോള്‍ പിന്നെ ഒരു വഴിയെ ഉള്ളൂ.. സ്കൂളിനു അടുത്താണ് കൊളസം മണിയുടെ വീട്.. അവനാണ് ഞങ്ങളുടെ കൂട്ടത്തില്‍ അത്യാവശ്യം പടം വരയും പിന്നെ നല്ല കയ്യക്ഷരവും ഒക്കെ ഉള്ളവന്‍ (എം എഫ് ഹുസൈന്റെ മോന്‍ ആണല്ലോ )

തല്ക്കാലം പോസ്റ്റര്‍ വേണ്ട.. പകരം ചുമരില്‍ കരി കൊണ്ട് നല്ല മുഴുത്ത അക്ഷരത്തില്‍ എഴുതിയാല്‍ മതി എന്ന് തീരുമാനിച്ചു.. നല്ല സാഹിത്യം തുളുമ്പുന്ന വാക്കുകള്‍ ഒപ്പിക്കണം.. വീണ്ടും ആലോചന.. ഒടുവില്‍ ഒരു കണക്കിന് അതും ഒപ്പിച്ചു..

ആദ്യം ഞങ്ങള്‍ ആറ്‌ പേരുടെ പേരുകള്‍ .. പിറകെ സാഹിത്യം -

മിന്നലിന്റെ വെളിച്ചം പോലെ , ഇടിയുടെ മുഴക്കം പോലെ , കൊടുങ്കാറ്റിന്റെ വേഗതയില്‍ .. ഇതാ ഞങ്ങള്‍ വരുന്നു.......
AALTHARA BROTHERS

ആഹാ... അടിപൊളി.. ഞങ്ങള്‍ ഞങ്ങളെ തന്നെ അഭിനന്ദിച്ചു .... !
ഓര്‍ക്കണം, രണ്‍ജി പണിക്കരോ സുരേഷ് ഗോപിയോ ഒന്നും അന്ന് ഫീല്‍ഡില്‍ ഇല്ല... കാശ് മേടിച്ചു ഇതൊക്കെ എഴുതിത്തരുന്ന അമ്മാവന്മാരും അന്നില്ല .. സിനിമയിലോ നാടകത്തിലോ ഇല്ലാത്ത മാതിരി ഡയലോഗ്സ് .. ഇത് ഞങ്ങള്‍ സ്പാറും എന്ന് തന്നെ ഉറപ്പിച്ചു..

സംഭവം വലിയ പേപ്പറില്‍ എഴുതി മണിയുടെ കയ്യില്‍ കൊടുത്തു..
"ഡാ അവന്‍ തെറ്റിക്കുവോ ? അത്യാവശ്യം നല്ലോണം അക്ഷരതെറ്റ് വരുത്തുന്നവനാണ്" സജി പറഞ്ഞു..
"എയ്യ് അതില്ല .. അതിനല്ലേ നമ്മള്‍ നല്ല വൃത്തിയായി എഴുതി കൊടുത്തു വിട്ടിരിക്കുന്നത് .. അത് നോക്കി അങ്ങട് എഴുതിയാല്‍ മതിയല്ലോ " - ഞാന്‍ പറഞ്ഞു

അപ്പൊ എല്ലാം റെഡി !
നമ്മളും ഒരു ഗാങ്ങായി എന്ന അഹങ്കാരത്തോടെ എല്ലാവരും ഉറങ്ങാന്‍ കിടന്നു ! ഇരുട്ടിന്റെ മറവില്‍ മണി എല്ലാം സെറ്റപ്പ് ആക്കി !!

പ്രഭാതം ! നേരത്തെ നിശ്ചയിച്ച പ്രകാരം ഞങ്ങള്‍ എല്ലാവരും ഒരുമിച്ചാണ് അന്ന് സ്കൂളിലേക്ക് പോയത് .. അതും അല്‍പ്പം വൈകിയാണ് ചെല്ലുന്നത്.. പിള്ളേര്‍ എല്ലാം ഞങ്ങളുടെ പരസ്യം ഒക്കെ കണ്ടു വിറച്ചു നില്‍ക്കുമ്പോള്‍ വേണമല്ലോ ചെല്ലാന്‍ !

പ്യൂണിന്റെ തിരുമുഖമാണ് ആദ്യം കണ്ടത്.. സാധാരണ ഗതിയില്‍ ഞങ്ങളെ കണ്ടാല്‍ ചതുര്‍ഥി കണ്ട പോലെ ഉള്ള പ്യൂണ്‍ ഇന്നിതാ ഞങ്ങളെ നോക്കി ചിരിക്കുന്നു... അത്ഭുതം !! അപ്പൊ സംഭവം ഏറ്റിട്ടുണ്ട് ..ഇപ്പൊ പുള്ളിക്കൊക്കെ ഞങ്ങളെ ഒരു ബഹുമാനം വന്നെന്നു തോന്നുന്നു ! (ആ ചിരിയില്‍ ഒരു പുച്ച്ചഭാവം ഇല്ലേ എന്ന് എനിക്ക് തോന്നിയിരുന്നു .. എല്ലാവര്ക്കും അങ്ങനെ തന്നെ തോന്നി എന്ന് പിന്നീട് അറിയാന്‍ കഴിഞ്ഞു )

നമ്മള്‍ എഴുതി വച്ചിരിക്കുന്നത് നമ്മള്‍ പോയി നോക്കരുതല്ലോ..അത് മോശമാണ്... അത് മറ്റുള്ളവര്‍ക്ക് കാണാനല്ലേ.. അത് കൊണ്ട് ആ വഴിയൊന്നും പോയില്ല.. നേരെ ക്ലാസില്‍ പോയിരുന്നു ! എല്ലാവരെയും ഒരുമിച്ചു നല്ല കുട്ടികളായി കണ്ട മാഷുമ്മാര്‍ ആ സന്തോഷം മറച്ചു വച്ചില്ല.. ചോദ്യം ചോദിക്കലും അടി മേടിക്കലും ഒക്കെ ഭംഗിയായിത്തന്നെ നടന്നു...

ഉച്ചയ്ക്ക് ഊണ് കഴിക്കുമ്പോള്‍ പതുക്കെ പയ്യന്മാര്‍ ഒക്കെ അത് വഴി വന്നു ഞങ്ങളെ നോക്കി ചിരിക്കുന്ന പോലെ.. ആ ചിരിയിലും എന്തോ പന്തികേട്..ഞങ്ങള്‍ അന്ന് ഒമ്പതാം ക്ലാസിലാണ്.. പത്താം ക്ലാസിലെ ഒരു കൂതറ ഗാങ്ങിലെ പയ്യന്മാര്‍ അത് വഴി വരുന്നു.. ഞങ്ങളെ കണ്ടതും എല്ലാരും പൊട്ടിച്ചിരിക്കുന്നു ! കമന്റടിയും ബഹളവും..

അത് വരെ മുഖത്ത് നോക്കാന്‍ പോലും ധൈര്യമില്ലാണ്ടിരുന്ന ഗേള്‍സ്‌ പലരും ഞങ്ങളെ കണ്ടു ചിരിയോടു ചിരി.. എന്റെ ഫാന്‍സ്‌ എന്ന് ഞാന്‍ കരുതിയിരുന്ന രെമ്യയും ധന്യയും വരെ കളിയാക്കി മരിക്കുന്നു.. ആരും ഒന്നും പറയുന്നുമില്ല .. ചിരി മാത്രം !!

ക്ലാസിലുള്ള മറ്റവന്മാര്‍ (മറ്റേ എതിര്‍ ഗാങ്ങില്‍ ഉള്ള ആഭാസന്മാര്‍) ഞങ്ങളെ തറകള്‍ കൂതറകള്‍ എന്നൊക്കെ വിളിക്കുന്നു..

ആത്മസംയമനം പാലിച്ചു ..

ആഹാ മോനെ , അവന്മാരുമായി ഇടി തുടങ്ങിയാല്‍ പിന്നെ നില്‍ക്കില്ല ..

ഇടി നില്‍ക്കില്ല എന്നല്ല , ഞങ്ങള്‍ക്ക് നില്‍ക്കാന്‍ പറ്റില്ല എന്ന് .. ഇറങ്ങി ഓടേണ്ടി വരും .. അത് കൊണ്ട് ഉടക്കാനും പോയില്ല !

ദൈവമേ , എന്തോ പിശക് പറ്റിയിട്ടുണ്ട്.. മണിയെ വിളിച്ചു ചോദിച്ചു.. എടാ നിനക്ക് പേര് വല്ലതും തെറ്റിപ്പോയോ ? എന്താ സംഭവം.. മണി പറഞ്ഞു ഒരു പ്രശ്നവുമില്ല എന്ന് ഉറപ്പാണ്... ഞങ്ങള്‍ എഴുതിക്കൊടുത്ത കടലാസ്സ്‌ ഒക്കെ എടുത്തു അവന്‍ കാണിച്ചു..
"ഇതില്‍ വള്ളി പുള്ളി വിടാതെ ഞാന്‍ എഴുതിയിട്ടുണ്ട് .. അമ്മയാണെ സത്യം " - മണി

ആകെ ടെന്‍ഷനായി.. വന്നു വന്നു താഴെ ക്ലാസിലുള്ള ചീള് പയ്യന്മാര്‍ വരെ ഞങ്ങളെ നോക്കി ചിരിക്കുന്നു ! ഇത് കൈവിട്ട കേസ് ആയെന്നു തോന്നിത്തുടങ്ങി.. എന്തായാലും ഇപ്പോള്‍ ചെന്നു നോക്കാന്‍ പറ്റില്ല.. എന്തെങ്കിലും പ്രശ്നമുണ്ടെങ്കില്‍ നാണക്കേടാണ്.. എല്ലാവരും പോകട്ടെ .. എന്നിട്ടാവാം എന്നു വച്ചു..

ഒരു വിധത്തില്‍ നാലു മണി വരെ തള്ളി നീക്കി.. ഗേള്‍സ്‌ ഒക്കെ ഞങ്ങളെ ഒരു മാതിരി കോമാളികള്‍ എന്ന പോലെ നോക്കിയിട്ട് ഇറങ്ങിപ്പോകുന്നു....സ്കൂളിലെ എല്ലാവരും പോയി.. ഞങ്ങള്‍ ആറ് പേരും പതുക്കെ ഇറങ്ങി.. പിന്നീട് ഒരു ഓട്ടമായിരുന്നു .. സ്കൂളിന്റെ പിന്നിലേക്ക്.. മണി ആയിരുന്നു ഏറ്റവും അവസാനം..

അവിടെ ചെന്നു ചുവരില്‍ നോക്കി.. ഞങ്ങളുടെ പരസ്യം കണ്ടു .. ഒരു കുഴപ്പവുമില്ല .. പറഞ്ഞ പോലെ നല്ല അടിപൊളിയായി എഴുതിയിട്ടുണ്ട്.. പേരുകളും സാഹിത്യവുമെല്ലാം അലങ്കാരപ്പണിയോടു കൂടി തന്നെ അവിടെ ഉണ്ട് ... പിന്നെന്താണ് പ്രശ്നം ?

വീണ്ടും സൂക്ഷിച്ചു നോക്കി..
ബള്‍ബുകള്‍ മിന്നി ....ഇപ്പൊ മനസിലായി !

"അയ്യോ !!! പണി പാളിയെടാ...........................!!!!!!!!!!!!!!!" സുനി ആ വാക്കുകളിലേക്ക് വിരല്‍ ചൂണ്ടി..

ഞങ്ങള്‍ അഞ്ചു പേരും അത് കണ്ടു തലയില്‍ കൈവച്ചു ദൈവമേ എന്ന് ഉറക്കെ പറഞ്ഞു .. മണി ഓള്‍മോസ്റ്റ്‌ കരഞ്ഞു പോയി !

അലവലാതി.. അവന്‍ കരയാന്‍ പോകുന്നതേയുള്ളൂ.. ഞങ്ങള്‍ അഞ്ചു പേരും അവന്റെ നേര്‍ക്ക് തിരിഞ്ഞു .. പക്ഷെ അപ്പോഴേക്കും അവന്‍ സ്കൂളിന്റെ മതില്‍ ചാടിത്തുടങ്ങിയിരുന്നു !

അതോടു കൂടി ഞങ്ങളുടെ പേര് ആ സ്കൂളും വിട്ടു നാട് മുഴുവന്‍ ഫേമസ് ആയി ! പല കൂട്ടുകാരും ഞങ്ങളെ ആ പേരിലാണ് ഇപ്പോഴും വിളിക്കുന്നത് (അതു ചിലപ്പോ ഈ കാരണം കൊണ്ടാല്ലായിരിക്കാം).. ഒരു അക്ഷരത്തിന്റെ മാറ്റം ഞങ്ങളുടെ ഗാങ്ങിനെ ജന്മദിനത്തില്‍ തന്നെ കൊന്നു കൊല വിളിച്ചു പണ്ടാരമടക്കി !

--the END--

** ഇതായിരുന്നു അന്ന് ചുമരില്‍ എഴുതിയിരുന്നത് ..

സുകു, സുനി ,സജി ,മണി,സനല്‍ ,കൊമ്പന്‍ (ഞാന്‍ )
മിന്നലിന്റെ വെളിച്ചം പോലെ , ഇടിയുടെ മുഴക്കം പോലെ , കൊടുങ്കാറ്റിന്റെ വേഗതയില്‍ ..

ഇതാ ഞങ്ങള്‍ വരുന്നു . . .

ALLTHARA BROTHERS

ഞങ്ങളുടെ ഗാങ്ങിന്റെ ശവപ്പെട്ടിയില്‍ അവസാനത്തെ ആണി അടിക്കാനെന്ന പോലെ ആ ALL ഇനും THARA യ്ക്കും ഇടയ്ക്ക് ഒരു ചെറിയ ഗ്യാപ്പും ഉണ്ടായിരുന്നു !!

ഊട്ടുപുരയിലെ യക്ഷി - ഒടുക്കം !!!

2010-03-02T09:43:00.000-08:00

യക്ഷിയുടെ ഊട്ടുപുര പദ്ധതിയുടെ 'നടു'ഭാഗം ഇവിടെയുണ്ട്

കോണിയില്‍ നിന്നും താഴെ ഇറങ്ങിയാല്‍ ചിലപ്പോള്‍ പിന്നീട് ഊഴം കിട്ടിയെന്നു വരില്ല.. താഴെക്കിടന്നു മറ്റവന്മാര്‍ ' നീ മാറ് , ഇനി ഞാന്‍ കാണട്ട് ' എന്ന ഇന്‍ ഹരിഹര്‍നഗര്‍ ലൈന്‍ പിടിച്ചു തുടങ്ങി.. എന്ത് ചെയ്യണം എന്നു ആലോചിച്ചു നിന്നപ്പോഴേക്കും സുകു കോണിയില്‍ കാലെടുത്തു വച്ചുകഴിഞ്ഞിരുന്നു..

"എടാ ആക്രാന്തമേ, ഇവിടെ ഒന്നും ആയില്ല " ഞാന്‍
"എനിക്ക് അത്രേം ആയതു മതി " സുകു..

പണ്ടേ ദുര്‍ബല , ഞാന്‍ കയറി നിന്നതോട് കൂട് ഗര്‍ഭിണി എന്ന അവസ്ഥയില്‍ നില്‍ക്കുന്ന കോണിയില്‍ അവനും ചവിട്ടിക്കയറി..അവന്റെ തല കയറ്റാന്‍ ഇടം ഇല്ല..

വലിഞ്ഞു കയറിയ സുകു ഒരു കൈ കോണിയില്‍ പിടിച്ചു കൊണ്ട് മറ്റേ കൈ കൊണ്ട് മൂന്നാമത്തെ ഓടു ഇളക്കി മാറ്റി..

"ഹയ്യോ ഹമ്മേ ഹമ്മച്ചിയേ" ..

കോണിയില്‍ പിടിച്ചിരുന്ന കൈ കൊണ്ട് സുകു സ്വന്തം കവിളില്‍ ആഞ്ഞടിക്കുന്നു.. മറ്റേ കൈ കൊണ്ട് മറ്റേ സ്വന്തം കവിളില്‍ ആഞ്ഞടിക്കുന്നു.. കോണിയിലെ പിടി വിട്ടതോടെ അലച്ചും കെട്ടി താഴോട്ട് വീഴുന്നു !! എല്ലാം ഞൊടിയിടയില്‍ നടന്നു !

എനിക്ക് ഒന്നും മനസിലായില്ല.. ആര്‍ക്കും !! ഞാന്‍ ചാടിയിറങ്ങി.. എന്താണ് സംഭവിച്ചത് എന്നറിയാണ്ട് വായും പൊളിച്ചു നിന്ന മണിയുടെ ഊഴമായിരുന്നു അടുത്തത്.. മുഖത്ത് കയ്യും പൊത്തി അവനും അലറുന്നു.. പിന്നെ എല്ലാം പടപടാന്നായിരുന്നു.. ഓരോരുത്തരായി മാറി മാറി സ്വയം അടി തുടങ്ങി.. ഒപ്പം കരച്ചിലും ബഹളവും..

ദൈവമേ യക്ഷി ! ഇത് യക്ഷി തന്നെ എന്നു മനസ്സില്‍ വിചാരിച്ചു തീരും മുന്‍പേ എനിക്കും കിട്ടി ഒരെണ്ണം.. അയ്യോ ! തിരയെണ്ണിപ്പോയി !!

സിറിന്ജ് കൊണ്ട് കുത്തണ പോലത്തെ വേദന.. എല്ലാരും ഊട്ടുപുരയുടെ ഉള്ളില്‍ കിടന്നു മരണവെപ്രാളം കാണിക്കുന്നു..
ഭഗവതീ.. എന്തായിത് ?

മൂന്നു നാലഞ്ചു ആറു നിമിഷം കഴിഞ്ഞപ്പോള്‍ സംഭവം മനസ്സിലായി..

"കടന്നലാടാ കടന്നല്‍ !! " മണി അലറി !

സുകു മാറ്റിയ ഓടിന്റെ ഇടയിലായിരുന്നു ആ ബ്ലഡി പ്രാണികള്‍ കൂടും കുടുംബവുമായി കഴിഞ്ഞിരുന്നത് ....!!!

ഈശ്വരാ പണി പാളി.. എന്ത് ചെയ്യും .. ഓടി ഇറങ്ങാനും പറ്റില്ല , ഇറങ്ങി ഓടാനും പറ്റില്ല !! .. ഏതു വഴി എങ്ങോട്ടോടാന്‍ ?
എല്ലാവന്മാരും തച്ചിന് കുത്ത് കൊള്ളുവാണ് .. വെറും പരാക്രമം.. വാഗണ്‍ ട്രാജഡി ഒക്കെ മനസ്സില്‍ മിന്നി മറയുന്നു !!
'ഇംഗ്ലീഷ് സിനിമ പോലെ' എന്നു ആദ്യം പറഞ്ഞത് തിരിച്ചെടുത്തു ഞാന്‍ ! ആദ്യം കണ്ടത് വെറും അവാര്‍ഡ്‌ ഭോജ്പൂരി പടം.. ഇംഗ്ലീഷ് പടം വരാന്‍ പോകുന്നേയുള്ളൂ ..

ഊട്ടുപുരയുടെ പുറത്തു നിന്നുള്ള ആംഗിള്‍ ! ഉള്ളില്‍ എന്തൊക്കെയോ ബഹളങ്ങള്‍ ..
പെട്ടന്ന്.. അതാ കുളക്കടവിന്റെ വശത്തുള്ള ജനല്‍ വെടിയുണ്ട തെറിക്കും പോലെ ഒരു മൂന്നു നാല് മീറ്റര്‍ അകലേയ്ക്ക് തെറിക്കുന്നു..

കടന്നലിന്റെ കുത്ത് കൊള്ളുന്നതിനിടയ്ക്കും ഞാന്‍ കണ്ടു.. സനല്‍ എന്ന കൊളുത്ത് പറന്നു ചെന്നു ജനലിന്റെ ഒറിജിനല്‍ കൊളുത്ത് നോക്കുക പോലും ചെയ്യാതെ ആഞ്ഞൊരു ചവിട്ട്.. ജനല്‍ പറന്നു അപ്പുറത്തെ പൊന്തക്കാട്ടില്‍ ..

ഐറോണിക് !!! പിഞ്ചു കുഞ്ഞിനെ എടുക്കുന്ന പോലെ മൃദുലമായി ലാളിച്ചു കൊന്ജിച്ചു അവന്‍ എടുത്തു ഫിറ്റ്‌ ചെയ്ത ജനലാണ് ആ പറക്കുന്നത്...
സാഹചര്യം മനുഷ്യനെ ക്രൂരനാക്കും എന്നു പറയുന്നത് എത്ര അര്‍ത്ഥവത്താണ് !

രേഷ്മയുടെ സിനിമയ്ക്ക് ടിക്കറ്റ് എടുക്കാനുള്ള ബഹളത്തെക്കാള്‍ ഭയങ്കര ഇടിയാണ് പിന്നെ അവിടെ നടന്നത്.. ഒരു വ്യത്യാസം മാത്രം.. ഇവിടെ അകത്തു കയറാനല്ല , പുറത്ത് ഇറങ്ങാനാണ് ഇടി !

ഒരു കണക്കിന് എല്ലാവരും പുറത്തിറങ്ങി.. ഊവാ ... കടന്നല്‍സ് ഉണ്ടോ വിടുന്നു.. ജനിച്ചിട്ട് ഇന്ന് വരെ ഒരു മനുഷ്യനെ കാണാത്ത ആര്‍ത്തിയോടെ വീണ്ടും വീണ്ടും പറന്നു കുത്തുന്നു !! ഇവറ്റകള്‍ക്കൊന്നും അച്ഛനും ആങ്ങളമാരും ഇല്ലേ എന്നു വരെ തോന്നിപ്പോയി ! അമ്മാതിരി കുത്ത് !

തേനീച്ചയും കടന്നലും ഒക്കെ കുത്താന്‍ വന്നാല്‍ രക്ഷപെടാന്‍ ഒരൊറ്റ മാര്‍ഗമേയുള്ളൂ... വെള്ളത്തില്‍ മുങ്ങിക്കിടക്കുക ! ബുദ്ധി വേറെ ആര്‍ക്ക് തോന്നാന്‍ ? അവിടെയും ഞാന്‍ തന്നെ ഇടപെട്ടു..

"എടാ.. എല്ലാരും വെള്ളത്തില്‍ ചാടിക്കോ.. ഇല്ലേല്‍ കുത്ത് കൊണ്ട് ചാവും... " - ഞാന്‍ വിളിച്ചു കൂവി

ഊട്ടുപുരയ്ക്കും കുളത്തിനും ഇടയില്‍ ചെറിയ ഒരു കയ്യാല ഉണ്ട്.. കുളത്തിലേക്ക് ചാടണമെങ്കില്‍ ആദ്യം അത് ചാടിക്കടക്കണം..എല്ലാവരും കയ്യാല ലക്ഷ്യമാക്കി ഓടി.. ഞങ്ങള്‍ അഞ്ചു പേരും നല്ല വൃത്തിയായി അത് ചാടിക്കടന്നു.. പിറകെ വന്ന ടെറര്‍ സുനി ആദ്യമായാണ്‌ അവന്റെ തടി വച്ച് അങ്ങനെ ഒരു സാഹസം ചെയ്യാന്‍ പോകുന്നത്.. അവന്റെ മനസ്സ് നല്ല ഉയരത്തില്‍ തന്നെ ചാടി.. എന്നാല്‍ ശരീരം പകുതിയേ ചാടിയുള്ളൂ.. കയ്യാലയുടെ മുകളില്‍ മുണ്ട് കുടുങ്ങി ..

മുണ്ട് അവിടുന്ന് പറിച്ചെടുക്കാന്‍ ശ്രമിക്കുന്ന സുനിയെയാണ് ഞാന്‍ തിരിഞ്ഞു നോക്കിയപ്പോള്‍ കണ്ടത്..
" എടാ , നില്‍ക്കല്ലേ, ഓട്, വേഗം വെള്ളത്തില്‍ ചാടെടാ .. മുണ്ട് പിന്നെ എടുക്കാം " ചാവുന്നതിലും ഭേദം മാനം പോകുന്നത് തന്നെ എന്നു കരുതി ഞാന്‍ വിളിച്ചു പറഞ്ഞു.. കടന്നലിന്റെ കുത്ത് സഹിക്കാന്‍ വയ്യാതെ സുനി മുണ്ട് അവിടെ ഉപേക്ഷിച്ചു ഓട്ടം തുടര്‍ന്നു..

ഓടിപ്പോയി കുളത്തിലേക്ക് എടുത്തു ചാടുന്നത് ഞങ്ങള്‍ക്ക് പുതുമയുള്ള കാര്യമല്ല.. അത് കൊണ്ട് ഞങ്ങള്‍ക്കിത് വളരെ ഈസിയായിരുന്നു... പക്ഷെ അത് ഞങ്ങളുടെ കടവില്‍ !! പെണ്ണുങ്ങളുടെ കടവില്‍ നിന്നിരുന്നവര്‍ എല്ലാരും ഈ ബഹളം കണ്ട് തിരിഞ്ഞു നോക്കി.. അവര്‍ക്ക് ഇത് പുതുമയുള്ള കാഴ്ച തന്നെയായിരുന്നു..

ഗടാഗടിയന്‍മാരായ ആറു യുവാക്കള്‍ അവരുടെ നേര്‍ക്ക് പാഞ്ഞു വരുന്നു.. അതില്‍ ഒരുത്തന് മുണ്ട് പോലുമില്ല.. കലികാലമല്ലേ.. ഓടി വരുന്നവന്റെ ഉദ്ദേശം എന്തു വേണമെങ്കിലും ആവാമല്ലോ...
അമ്മച്ചിമാര്‍ കലിപ്പായി നോക്കുന്നു.. തരുണീമണികള്‍ ചെറിയ പേടിയോടെയും ( 'പ്രതീക്ഷയോടെ' എന്നു സജിയുടെ വേര്‍ഷന്‍ ) തുറിച്ചു നോക്കുന്നു.. ചിലര്‍ കരയാന്‍ പോകുന്ന പോലെ ഒക്കെ 'അഭിനയിക്കുന്നു' ..
അല്ലേലും ചെറിയ കാര്യങ്ങള്‍ എക്സാജെരയ്റ്റ് ചെയ്യുന്നത് പെണ്‍പിള്ളേരുടെ ഒരു ഹോബി ആണല്ലോ ... ആകെ പ്രശ്നമയം !

സിറ്റുവേഷന്‍ മനസ്സിലായിട്ടാണോ എന്തോ , ഒന്ന് രണ്ടു കടന്നലുകള്‍ എനിക്ക് എന്തായാലും ഒരു ഉപകാരം ചെയ്തു.. മുഖത്ത് തന്നെ നല്ല ഭംഗിയായി കുത്തി.. അത് കൊണ്ട് എനിക്ക് മുഖം പൊത്തി ഓടാന്‍ പറ്റി..കുത്ത് കൊള്ളുന്ന സ്ഥലം പൊത്തി സുനി ഒഴികെയുള്ളവന്മാരും ഓടുന്നു. മുണ്ട് പറിഞ്ഞു പോയി അണ്ടന്‍ മാത്രം ഇട്ടു കൊണ്ട് ഓടുന്ന ടെറര്‍ മാത്രം എവിടെ കുത്ത് കൊണ്ടിട്ടും ഒരു സ്ഥലം മാത്രം പൊത്തി ഓടുന്നു. തരുണികള്‍ ഞങ്ങളെ തിരിച്ചറിയരുതെ എന്നു മാത്രമായിരുന്നു എല്ലാവരുടെയും പ്രാര്‍ത്ഥന !

ഞങ്ങള്‍ കടവിനോട് അടുക്കുന്തോറും തരുണികളുടെ ബഹളം ഉച്ചത്തിലായി.. എന്ത് കഷ്ട്ടമാണെന്ന് നോക്കണേ ! മനുഷ്യന്‍ ഇവിടെ ജീവന്മരണപ്പോരാട്ടം , അപ്പോഴാണ്‌ അവളുമാരുടെ അഭിനയം !

എന്തായാലും കടവില്‍ ഇറങ്ങാന്‍ പറ്റില്ല.. ഞങ്ങള്‍ ആറു പേരും കടവിന് മുന്നിലൂടെ ആരെയും ശ്രദ്ധിക്കാതെ ഒരേ ഓട്ടം.. ഇത് കണ്ട് അവിടെ നിന്നവര്‍ വാ പൊളിച്ചു നില്‍ക്കുന്നു.. ഇപ്പൊ അവര്‍ ഒച്ചപ്പാടൊക്കെ നിര്‍ത്തി ചിരി തുടങ്ങി ! വലിയ ആറു തേങ്ങാ വെള്ളത്തില്‍ വീഴുന്നത് പോലെ എല്ലാവരും വരി വരിയായി പോയി വെള്ളത്തില്‍ ചാടി..

കളി നമ്മുടെ അടുത്തോ ? കുളത്തിന്റെ പകുതി വരെ മുങ്ങി നീന്തി പരിചയമുള്ള ഞങ്ങള്‍ക്ക് എങ്ങിനേം തല വെള്ളത്തിന്‌ മീതെ പൊക്കാതെ മറുവശം വരെ മുങ്ങി നീന്താം എന്ന കോണ്‍ഫിഡന്‍സ് ഉണ്ടായിരുന്നു.. ചാടിയ വഴി മുങ്ങി നീന്തുകയും ചെയ്തു..

അങ്ങനെ ഒരുപാട് നീന്തി.. ശ്വാസം മുട്ടി ചാവുന്ന സ്ഥിതിയായി.. ഭാഗ്യം.. നില കിട്ടി തുടങ്ങി .. ഞാന്‍ തല പൊക്കി.. ഒപ്പം പിറകെ നീന്തി വന്ന മൂന്നു തലകളും പൊങ്ങി !

ഭഗവതീ.. അടുത്ത പരീക്ഷണം.. ഇത്തവണ കരഞ്ഞത് ഞങ്ങള്‍ നാലു പേരാണ്.. കുളത്തില്‍ ചാടിയ വഴി കണ്ണും പൂട്ടി മുങ്ങി നീന്തിയ ദിശ മാറിപ്പോയി.. ഞാനും സജിയും സുകുവും മണിയും നീന്തി എത്തിയത് തരുണികളുടെ കടവില്‍ .. അവിടെ നില്‍ക്കുന്ന തരുണികള്‍ ചിരിയോടു ചിരി... അമ്മച്ചിമാര്‍ തെറിയോടു തെറി.. ചാണകത്തില്‍ ചവിട്ടിയിട്ട് 'അയ്യേ' എന്നു പറഞ്ഞു നില്‍ക്കുന്നവന്റെ തലയില്‍ കാക്ക കാഷ്ട്ടിച്ച അവസ്ഥയിലായി ഞങ്ങള്‍ !

തിരിഞ്ഞു നോക്കി.. മറ്റവന്മാര്‍ രണ്ടു പേരും മറുകര പുല്‍കാറായി !! ഞങ്ങള്‍ക്ക് ഇനി തിരിച്ചു നീന്താനുള്ള ശേഷി ഇല്ല..
രണ്ടും കല്‍പ്പിച്ചു പടവുകളിലൂടെ വലിഞ്ഞു കയറി ചെവിയും പൊത്തി ഞങ്ങള്‍ വച്ചു പിടിച്ചു !!

വലിയ ആ ദുരന്തത്തിന്റെ പ്രമുഖ ബാക്കിപത്രമായത് ഞങ്ങള്‍ നാലു പേര്‍ .. കുറച്ചു നാള്‍ എങ്ങോട്ടെങ്കിലും മാറി നില്‍ക്കാമെന്നു പറഞ്ഞു മണി കുറച്ചകലെയുള്ള അവന്റെ വലിയമ്മയുടെ വീട്ടിലേക്ക് പോയി.. സുകു അവന്റെ അമ്മാവന്റെ തടിക്കൂപ്പിലെക്കും പോയി..
ഞാനും സജിയും ബാക്കി.. ഞങ്ങള്‍ക്ക് എങ്ങോട്ടും പോകാനില്ല.. പോകാന്‍ ഒരിടവും ഇല്ല
അത് കൊണ്ട് ,

ഞങ്ങള്‍ ഒരു സിനിമയ്ക്ക് പോയി !! !! !!

***********************************************************

നന്ദിപ്രകാശനം : അഭിപ്രായങ്ങള്‍ അറിയിച്ച എല്ലാവര്ക്കും ഈ കൊലകൊമ്പന്റെ പുറത്തു ഒരു സവാരി ഫ്രീ.. ഇനി അഭിപ്രായം അറിയിക്കാനുള്ളവര്‍ എത്രെയും പെട്ടന്ന് ചെയ്യുക.. അല്ലെങ്കില്‍ ചിലപ്പോള്‍ എനിക്ക് മദം പൊട്ടും ! പിന്നെ ഈ കമന്റ് ബോക്സ്‌ ഒക്കെ അടച്ചു പൂട്ടി ചിലപ്പോ ഞാന്‍ വേറെ ഒരു പോസ്റ്റ്‌ എഴുതി നിങ്ങളെ കുത്തിക്കൊല്ലും !!

ഊട്ടുപുരയിലെ യക്ഷി - നടുക്കം !!

2010-02-26T06:42:00.000-08:00

ഊട്ടുപുര പദ്ധതിയുടെ തുടക്കം ഇവിടെയുണ്ട് !

നഷ്ട്ടപ്പെട്ട ഇമേജ് തിരിച്ചു കൊണ്ടുവരാന്‍ എന്ത് വില കൊടുത്തും ഊട്ടുപുര-കുളക്കടവ് പദ്ധതി നടപ്പിലാക്കാന്‍ ഞങ്ങള്‍ തീരുമാനിച്ചു. അങ്ങനെ, ഓപറേഷന്‍ ഊട്ടുപുരയുടെ ഏകദേശ സ്കെച്ച് റെഡി ആയി..

ആദ്യം അതിന്റെ ഉള്ളില്‍ കയറിപ്പറ്റണം.. രാത്രി മാത്രമേ അതിനു സാധിക്കുകയുള്ളൂ..

അമ്പലത്തിലെ പൂജാരി ഒരു പാവം എമ്പ്രാന്തിരി.. ആരോടും മിണ്ടുക പോലുമില്ല.. അദ്ദേഹത്തിന് ശബ്ദം ഉണ്ടോ എന്ന് പോലും പലപ്പോഴും സംശയം തോന്നിയിട്ടുണ്ട്.. ഞങ്ങള്‍ ആലിന്റെ ചുവട്ടില്‍ എന്ത് അലമ്പ് കാണിച്ചിട്ടും ഇത് വരെ അദ്ദേഹം ഒരു അക്ഷരം പോലും മിണ്ടിയിട്ടില്ല .. അത് കൊണ്ട് ഞങ്ങള്‍ക്ക് പുള്ളിയെ ഭയങ്കര റെസ്പെക്ടാണ്..

ഒരു വെള്ളിയാഴ്ച തന്നെ തിരഞ്ഞെടുത്തു..അതാവുമ്പോള്‍ യക്ഷിയെ പേടിച്ചു ഒരു പൂച്ച പോലും ആ വഴിക്ക് വരില്ലല്ലോ..

ഞങ്ങള്‍ ആറു പേര്‍ (എല്ലാം ഇരട്ടപ്പേരോട് കൂടിയത്) - മൂരി സുകു, ടെറര്‍ സുനി ,താറാവ് സജി ,കൊളസം മണി,കൊളുത്ത് സനല്‍, പിന്നെ ഞാനും (എനിക്ക് അന്ന് ഇരട്ടപ്പേര് ഇല്ല .. പിന്നെയാണ് കിട്ടിയത്.. അത് വേറെ ഒരു ഡെസ്പ് കഥ ! )

ഊട്ടുപുരയുടെ അടുത്ത് ചെന്നു.. ഒറ്റ വാതിലെ ഉള്ളൂ.. 'വട' ഇറങ്ങിപ്പോകാണ്ടിരിക്കാന്‍ വേണ്ടി അതില്‍ മണിച്ചിത്രത്താഴ് പോലെ ഒരു പൂട്ടിട്ട് സീല്‍ ചെയ്തു വച്ചിരിക്കുന്നു.. ഞങ്ങള്‍ ചുറ്റും കറങ്ങി.. കുളക്കടവിന്റെ ദിശയില്‍ , ദ്രവിച്ച ഒരു ജനല്‍ കണ്ടു ! ഇവന്‍ തന്നെ നമ്മുടെ ഇര.. ഒരാള്‍ക്ക് കഷ്ടി കയറാം..

സ്വതവേ ആക്രാന്തം അല്‍പ്പം കൂടുതലുള്ള സജി അതില്‍ പിടിച്ചു വലി തുടങ്ങി.. തേങ്ങാ ചിരണ്ടുന്നത് ലൌഡ് സ്പീക്കര്‍ വഴി കേള്‍ക്കുന്ന പോലെ സാമാന്യം നല്ല ശബ്ദം..

"കൊളുത്താണ് കലിപ്പ് " - സജി
"ഞാന്‍ എന്ത് കോപ്പ് ചെയ്തു" - സനല്‍ ഇപ്പൊ ശെരിക്കും കലിപ്പ്
"നീ അല്ലേടാ കൊളുത്തെ , ജനലിന്റെ കൊളുത്ത്" - സജി
"നീ ഇങ്ങു മാറ് .. ഞാന്‍ ശരിയാക്കാം " ഇതും പറഞ്ഞു സനല്‍ സജിയെ തള്ളി മാറ്റി ജനല്‍ സസൂക്ഷ്മം നിരീക്ഷിച്ചു ! എന്നിട്ട് പശുവിനെ കറക്കാന്‍ പോണ പോലെ വിരലുകള്‍ ഒരു പ്രത്യേക ആകൃതിയില്‍ വച്ച് ജനലിന്റെ വിടവിലൂടെ തിരുകിക്കയറ്റി എന്തൊക്കെയോ ചെയ്യുന്നു.. ഇവന്‍ ഇപ്പൊ ഒണ്ടാക്കും എന്ന മട്ടില്‍ സജിയും നില്‍ക്കുന്നു..

ഭേഷ് !! ജനല്‍ പാളി അതാ തുറന്നു വരുന്നു.. ഞങ്ങള്‍ പറന്നു മുന്നോട്ടാഞ്ഞു..

"അടുക്കരുത് ! എന്തായിരുന്നു നിന്റെയൊക്കെ ബഹളം.. ഇത്രേം ചെയ്‌താല്‍ ഇത് ഊരുന്ന കാര്യവും ഞാന്‍ നോക്കിക്കോളാം" കൊളുത്ത് ആധികാരികമായി പറഞ്ഞു.. ഞങ്ങള്‍ വീണ്ടും പിന്നോട്ട് നീങ്ങി ഒതുങ്ങി നിന്നു..

ചെത്തുകാരന്‍ കണാരന്‍ ചേട്ടന്റെ മോനാണ് കൊളുത്ത്. നിറഞ്ഞു കവിഞ്ഞ (നാട്ടുകാര്‍ 'അവിഞ്ഞ' എന്നും പറയും) കള്ളു മാട്ടം ഒരു തുള്ളി പോലും തുളുമ്പാതെ തെങ്ങില്‍ നിന്നും താഴെ എത്തിക്കുന്ന കണാരന്‍ ചേട്ടന്റെ മകനെ സൂക്ഷ്മത പഠിപ്പിക്കേണ്ട ആവശ്യം ഇല്ല.. യക്ഷിയുടെ വടയുടെ കാര്യം പറഞ്ഞപ്പോള്‍ താറാവിനെ നോക്കിയ അതേ ആരാധനയോടെ ഇത്തവണ ഞങ്ങള്‍ കൊളുത്തിനെ നോക്കി നിന്നു..

ഇംഗ്ലീഷ് സിനിമയിലൊക്കെ കാണുന്ന പോലെ കൊളുത്ത് പയ്യെ ജനല്‍ കയ്യിലേക്ക് അടര്‍ത്തിയെടുക്കുന്നു.. പട്ടക്കുപ്പി പിടിക്കുന്ന സൂക്ഷ്മതയോടെ അത് പയ്യെ നിലത്തു ചാരി വയ്ക്കുന്നു.. ആകെ ഒരു പ്രൊഫഷണല്‍ ടച് ! പുവര്‍ ഗയ്.. ഇവന്‍ ഇവിടെ ഒന്നും ജീവിക്കെണ്ടാവനേ അല്ല ..

ജനല്‍ തുറന്നതോടു കൂടി ആകെ ബഹളമയം .. ഇത് വരെ എല്ലാം മാറി വീക്ഷിച്ചു കൊണ്ടിരുന്ന സുനി ഓടി വന്നു ഉള്ളിലേക്ക് തള്ളിക്കയറാന്‍ ശ്രമിക്കുന്നു.. എല്ലാവരും കൂടി ഒരു കണക്കിന് പിടിച്ചു മാറ്റുന്നു..

"എടാ ഇതിന്റെ അകത്തു കുറ്റാകൂരിരുട്ടാണ്. ഇപ്പൊ കയറിയിട്ട് എന്തോ കാണാനാ ? ഇപ്പൊ നമ്മള്‍ ഇത് തുറക്കാന്‍ വേണ്ടി മാത്രം വന്നതാ.. നാളെ ഉച്ചയ്ക്ക് ഉള്ളില്‍ കയറണം" - ഞാന്‍

മനസ്സില്ലാമനസോടെ സുനി സമ്മതിച്ചു .. അങ്ങനെ അകത്തു കയറാനുള്ള വഴി റെഡി ആക്കി ഞങ്ങള്‍ പിരിഞ്ഞു..

കുളക്കടവ് സ്വപ്നം കാണണമെങ്കില്‍ മിനിമം ഉറങ്ങുവെങ്കിലും വേണം .. അന്ന് അതും സംഭവിച്ചില്ല !

പിറ്റേ ദിവസം.. ശനിയാഴ്ച ! അങ്ങനെ, കാത്തിരുന്ന ആ ദിവസം എത്തി.. രാവിലെ ഉറക്കം എഴുന്നേറ്റ് ഉമ്മറത്തേക്ക് വന്ന ഞാന്‍ ആദ്യം കാണുന്നത് ചിറ്റപ്പന്റെ മുഖമാണ്.. ജീവിതത്തില്‍ ഇത് വരെ ചിറ്റപ്പനെ കണ്ടു ഇത്രേം സന്തോഷിച്ചിട്ടില്ല .. നല്ല കണി.. ഇന്ന് എന്തേലുമൊക്കെ നടക്കും !!

ഉച്ച സമയത്താണ് സ്ഥലത്തെ രംഭയും മേനകയും തിലോത്തമയും ഒക്കെ കുളം ഉഴുതു മറിക്കാന്‍ വരുന്നത്.. ഉച്ച വരെ എങ്ങനെ തള്ളി നീക്കിയെന്ന് ഒരു പിടിയുമില്ല .. പതിനൊന്നു മണിയോട് കൂടി അമ്പലവും പരിസരവും കാലിയായി.. ആറംഗ സംഘം ഊട്ടുപുരയുടെ അടുത്തെത്തി.. എല്ലാം വളരെ പെട്ടന്നായിരുന്നു.. ജനല്‍ പാളി എടുത്തു മാറ്റുന്നു, ആറു പേര്‍ ഉള്ളില്‍ കയറുന്നു , പാളി (പാളാന്‍ പോണല്ലേയുള്ളൂ !! ) എടുത്തു തിരികെ വയ്ക്കുന്നു.. എല്ലാം ഒരു ഒന്നേകാല്‍ മിനുട്ടിനുള്ളില്‍ കഴിഞ്ഞു..

എന്റെ പോന്നോ .. ഭാര്‍ഗവീ നിലയത്തില്‍ കയറിയ അവസ്ഥ.. മാറാമ്പലും പൊടിയും മാത്രം.. എല്ലാവന്മാരും തുമ്മലും തുടങ്ങി.. അവിടെയിരുന്ന എന്തോ എടുത്തു മാറാമ്പല്‍ ഒക്കെ വകഞ്ഞു മാറ്റി.. ചുവരുകളില്‍ പൊടി നിറഞ്ഞിരുന്നു.. അതിനു കീഴെ എന്തൊക്കെയോ ചിത്രങ്ങള്‍ പോലെ..

ദൈവമേ.... നാഗവല്ലിയുടെ പടം വല്ലതും ആയിരിക്കുമോ ? തുടച്ചു നോക്കി.. നല്ല ഒന്നാംതരം ചിത്രങ്ങള്‍ .. എല്ലാം തരുണീമണികളുടെ !! പല രൂപത്തില്‍ , പല ഭാവത്തില്‍ . . പല വേഷത്തില്‍ എന്ന് പറയണമെങ്കില്‍ എന്തേലും വേഷം വേണമല്ലോ.. അത് മാത്രം ഇല്ല !! കാര്യം മനസിലായി.. കുളക്കടവില്‍ നിന്നും ഇന്‍സ്പയെര്‍ഡായി പഴയ വീരന്മാര്‍ വരച്ചു വച്ചതാണ് .. ആറു ബള്‍ബ് ഒരേസമയം മിന്നി.. അതില്‍ അന്ജെണ്ണം ഒരുമിച്ചു തിരിഞ്ഞു പിന്നില്‍ നില്‍ക്കുന്ന കൊളസം മണിയെ നോക്കി.. മണി തിരിഞ്ഞു നോക്കിയില്ല.. പിന്നില്‍ ആരും ഇല്ലാത്തത് കൊണ്ടല്ല നോക്കാഞ്ഞത്‌ ,

ഞങ്ങളുടെ നാട്ടിലെ ഒരേയൊരു എം എഫ് ഹുസൈന്‍ അവന്റെ അപ്പന്‍ രാജപ്പന്‍ ആശാരിയാണ്‌ !!

എന്ത് പറയാന്‍ .. അപ്പൊ അങ്ങിനെയൊക്കെയാണ് കാര്യങ്ങളുടെ കെടപ്പ്..ഓള്‍ഡ്‌ ജെനറേഷന്‍ പിടിവിട്ട് മുകളിലോട്ട് പോയ്ക്കോണ്ടേയിരിക്കുന്നു .. കോമ്പ്ലക്സ് ക്വാട്രപിള്ട് !!

ഓടു നീക്കണം.. ചുറ്റിനും നോക്കി.. സെറ്റപ്പ് അവിടെ തന്നെയുണ്ട്.. ചെറിയ ഒരു മരഗോവണി.. അതും കുളക്കടവിലേക്ക് നോക്കാന്‍ പറ്റിയ ഓടിനു നേരെ താഴെ ! ഇത്രെയും നേരം ബുദ്ധി കൊണ്ട് മാത്രം സഹായിച്ച ഞാന്‍ തന്നെ ആദ്യം കയറാമെന്ന് പറഞ്ഞു..

പറഞ്ഞില്ല , പറഞ്ഞാല്‍ സമ്മതിക്കില്ല.. അത് കൊണ്ട് ഞാന്‍ പറന്നു ചെന്നു ഗോവണിയില്‍ പതുക്കെ കയറി.. ഓടു നീക്കി.. തല കയറുന്നില്ല.. ഒരണ്ണം കൂടി മാറ്റി . പെര്‍ഫെക്റ്റ്‌ ! കുളക്കടവ് വിശാലമായി കാണാം.. ഭഗവതീ, പരീക്ഷണമാണോ.. ഒരു നാലഞ്ചു തരുണികളും മൂന്നു നാല് അമ്മച്ചിമാരും.. ആരും കുളത്തില്‍ ഇറങ്ങിയിട്ടില്ല .. അലക്കുകയാണ്.. അല്ല ! ഞങ്ങളുടെ ക്ഷമ അളക്കുകയാണ്...

[നിങ്ങളുടെയും ക്ഷമ അളക്കുവാണോ ഞാന്‍ ? .. 'തുട'ക്കവും 'നടു'ക്കവും കഴിഞ്ഞു എങ്ങിനേം ഒന്ന് ഒടുക്കിയാല്‍ മതിയെന്നാണോ ? ഉടനേ ഒടുക്കാമേ ]

well... ഒടുക്കി........

ഊട്ടുപുരയിലെ യക്ഷി - തുടക്കം !

2010-02-25T06:47:00.001-08:00

"ആലായാല്‍ തറ വേണം , അടുത്തോരമ്പലം വേണം, അമ്പലത്തിനടുത്തൊരു കുളവും വേണം.. "

ഞങ്ങളുടെ അമ്പലത്തിലും ഉണ്ടായിരുന്നു ഒരു ആല്‍മരം .. അതിനു തറ ഉണ്ടായിരുന്നില്ല , പക്ഷെ പകരം ഞങ്ങള്‍ എല്ലാരും അതിന്റെ കീഴെത്തന്നെ കൂട് കൂട്ടിയിരുന്നത് കൊണ്ട് വേറെ തറ കെട്ടേണ്ട എന്ന് ഫാരവാഹികള്‍ തീരുമാനിച്ചു പോലും !

ആലിനു കുളം കൊണ്ട് വലിയ പ്രയോജനം ഉണ്ടായിരുന്നു എന്ന് തോന്നിയിട്ടില്ല.. എന്നാല്‍ ഞങ്ങള്‍ക്ക് ഒരുപാട് ഗുണങ്ങള്‍ ഉണ്ടായിരുന്നു..

രാവിലെയും വൈകീട്ടും , എന്തിനു നട്ടുച്ചയ്ക്ക്ക് പൊരിവെയിലത്ത്‌ പോലും മനസ്സമാധാനത്തോടെ [എന്ന ഭാവേന] ആ നാട്ടിലെ പെണ്‍കുട്ടികള്‍ക്ക് അവിടെ കുളിക്കാന്‍ വരാന്‍ പറ്റില്ല എന്ന് വരെയായി അവിടത്തുകാരുടെ പരാതി... അവസാനം ഈ പെണ്‍പിള്ളേരുടെ ശല്യം കാരണം ഞങ്ങള്‍ ആണ്‍കുട്ടികളുടെ വീട്ടുകാര്‍ക്ക് പൊറുതിയില്ലാ എന്നായി .

ഇത്രേം വലിയ ചെറുക്കനോട് എങ്ങനെ നേരിട്ട് ഇതൊക്കെ ചോദിക്കും എന്ന് ഓര്‍ത്തിട്ടായിരിക്കും അമ്മ ഈ കാര്യം അച്ഛന്റെ ഇളയ അനിയന്റെ വൈഫിനോട് [ഇളയമ്മയോട്] പറഞ്ഞു . ചിറ്റപ്പനെക്കൊണ്ട് പറയിപ്പിച്ചു എന്നെ നേരെയാക്കാം എന്ന വ്യാമോഹമായിരുന്നു അമ്മയ്ക്ക്.. എന്തായാലും ഇളയമ്മ ദൌത്യം ചിറ്റപ്പനെ ഏല്‍പ്പിച്ചു..

ചിറ്റപ്പന്‍ ! നല്ല ബെസ്റ്റ് ടീം ആണ്..

പട്ടയടിക്കാത്ത ചിറ്റപ്പനെ കാണുന്നത് നാട്ടുകാര്‍ക്ക് മകരവിളക്ക് കാണുന്നപോലെയാണ്‌.. വര്‍ഷത്തില്‍ ഒരിക്കലോ മറ്റോ സംഭവിക്കുന്ന അത്ഭുതം... പുള്ളിയുടെ ആയകാലത്ത് ആ നാട്ടില്‍ പെണ്‍കുട്ടി ജനിക്കുന്നത് പോലും മാതാപിതാക്കള്‍ പേടിച്ചിരുന്നു.. അത്രയ്ക്ക് ഭീകരന്മാരായിരുന്ന വായ്നോക്കികളായിരുന്നു പുള്ളിയും പുള്ളിയുടെ കൂട്ടുകാരും ! അമ്മയും ഇളയമ്മയും ആ നാട്ടുകാര്‍ അല്ലാത്തത് കൊണ്ട് ഇതൊന്നും അറിയില്ലല്ലോ.. ആ നാട്ടില്‍ നിന്നോ അതിന്റെ ഒരു പത്തു നെയിബറിംഗ് ഗ്രാമത്തില്‍ നിന്നോ ചിറ്റപ്പന് പെണ്ണ് കിട്ടാത്തത് കൊണ്ട് കേരളത്തിന്റെ വടക്കേ അറ്റത് നിന്നാണ് ഇളയമ്മയെ ഒപ്പിച്ചത്.. എന്ന് വച്ചാല്‍ കെട്ടിയത് !!

അങ്ങനെ ഒരു ദിവസം ചിറ്റപ്പന്‍ എന്നെ പുള്ളിയുടെ വീട്ടിലോട്ട് വിളിപ്പിച്ചു.. ഞാന്‍ ചെല്ലുമ്പോള്‍ പുള്ളി രണ്ടു ഗ്ലാസ് പട്ടയൊക്കെ അടിച്ചു ഡോഞ്ജിയായിട്ട് ഇരിക്കുന്നു.. കൂടെ നാട്ടിലെ പേരെടുത്ത ക്രോണിക് ബാച്ചിലര്‍ കുടിയന്‍ 'കോട്ടമാങ്ങ' എന്ന ചെല്ലപ്പേരുള്ള രാമന്‍കുട്ടി അണ്ണനും ഉണ്ട്..

"എടാ നിന്നേം നിന്റെ കൂട്ടുകാരേം കുറിച്ച ചില ന്യൂസ് കേട്ടല്ലോ " ചിറ്റപ്പന്‍ . .

ദ കിങ്ങില്‍ മമ്മൂട്ടി പറയുമ്പോലെ 'വിനീത വിധേയന്റെ വിഡ്ഢിവേഷം കെട്ടി ' ഞാന്‍ അവിടെ നിന്നു..

കാണാന്‍ വരുന്നവരുടെ മുന്നില്‍ നാണിച്ചു നില്‍ക്കുന്ന പെണ്ണിനെപ്പോലെ ..

"നീയെന്താടാ ചേന വരയ്ക്കുന്നോ " എന്റെ ഭാവം കണ്ടു കോട്ടമാങ്ങയുടെ കമന്റ്‌ .. അല്ലേട മ..മ... മാങ്ങേ , ഞാന്‍ മനസ്സില്‍ പറഞ്ഞു.. അങ്ങേരുമായി ഞങ്ങള്‍ പയ്യന്മാര്‍ പണ്ടേ കലിപ്പാ.. അത് വേറെ കഥ !

"എടാ നമ്മുടെ തറവാട്ടില്‍ ആരും ഇത് വരെ ഇങ്ങനെ കൂളി കളിച്ചു നടന്നിട്ടില്ല.. പിള്ളേര്കളി ഒക്കെ ഒരു പരിധി വരെ കൊള്ളാം.. പക്ഷെ ഇത് അങ്ങനെ അല്ലാലോ.. " വളരെ നിഷ്ക്കളങ്കനായി ചിറ്റപ്പന്‍ പറയുന്ന തള്ള് കേട്ട ഞാന്‍ വാ പൊളിച്ചു നില്‍ക്കുന്നു.. ഞാന്‍ നോക്കിയപ്പോ മോന്തിയ ഗ്ലാസ്‌ പാതി നിര്‍ത്തി കോട്ടമാങ്ങയും അത്ഭുതത്തോടെ ചിറ്റപ്പനെ നോക്കി ഇരിക്കുന്നു...

ചിറ്റപ്പന്‍ തുടര്‍ന്നു , പട്ടയടി !

ഞാന്‍ അക്ഷമനായി കാത്തു നില്‍ക്കുന്നു.. ആകെ ഒരു അവാര്‍ഡ്‌ പടത്തിന്റെ പ്രതീതി..

"നിന്റെയൊക്കെ പ്രായം കഴിഞ്ഞാണ് ഞങ്ങളും വന്നത്.. ഇത് പോലെ നാട്ടുകാര്‍ക്ക് തലവേദന ഉണ്ടാക്കുന്ന പണി ഒന്നും ഞങ്ങള് ചെയ്തിട്ടില്ലല്ലോ ? " ചിറ്റപ്പന്‍ ചോദ്യഭാവത്തില്‍ കോട്ടമാങ്ങയെ നോക്കുന്നു.. മാങ്ങ അത് ശെരി വച്ചിട്ടാണോ അതോ കഴുത്ത് ഉറയ്ക്കാത്തത് കൊണ്ടാണോ , തല കുലുക്കുന്നു ..

ചിറ്റപ്പന്‍ വീണ്ടും മോന്തുന്നു .. കുറേശ്ശേയായി നാക്ക് കുഴഞ്ഞു തുടങ്ങി.. പുള്ളി ഒന്ന് വീണാല്‍ വീട്ടില്‍ പോകാമായിരുന്നു.. ഞാന്‍ പട്ടക്കുപ്പിയിലേക്കും ചിറ്റപ്പന്റെ മുഖത്തേക്കും മാറി മാറി നോക്കുന്നു..

"നീയൊക്കെ കുഴത്തിലേക്ക് നോക്കിക്കൊണ്ട് ആലിന്റെ ചോട്ടില്‍ ഇരിക്കുന്നത് എന്ത് കോപ്പ് കാണാനാ ?"

'കുള'ത്തില്‍ നിന്നും 'കുഴ'ത്തിലേക്ക് ചിറ്റപ്പന്‍ തെന്നി വീണു കഴിഞ്ഞിരുന്നു !! മാങ്ങ പതുക്കെ അവിടെയുള്ള ഒരു കുഴിയിലേക്കും ചാരി !

"അവിടെ നിന്നാല്‍ കടവ് പോയിട്ട് തെങ്ങിന്റെ മണ്ട പോലും കാണാന്‍ പറ്റില്ലല്ലോടാ ? ഞങ്ങള് പണ്ട് ഊട്ടുപുരയുടെ ഉള്ളില്‍ കയറി ഓടു നീക്കിയാണ് കുളത്തിലേക്ക് നോക്കാറ് .. അവിടെ നിന്നാല്‍ കടവും കാണാം , കടവിലുള്ളവര്‍ ഞങ്ങളെ കാണുകയുമില്ല .. അല്ലേടാ കൊട്ടമാങ്ങെ ? "

ചെര്‍പ്പില്‍ക്കാവിലെ വെടിക്കെട്ടിന് പൊട്ടിക്കുന്ന അമിട്ട് ഒരെണ്ണം എന്റെ തലയുടെ ഏകദേശം ദക്ഷിണ-മധ്യ ഭാഗത്തായി പൊട്ടുന്ന പോലൊരു തെളിച്ചം ! രണ്ടു മൂന്നു കിളിയും പറന്നു പോണ പോലെ തോന്നി.. ഈശ്വരാ.. ആലിന്റെ ചുവട്ടില്‍ നിന്നാല്‍ ചിറ്റപ്പന്‍ പറയുന്ന പോലെ തെങ്ങിന്റെ മണ്ട പോലും കണ്ടിട്ടുമില്ല , ചീത്തപ്പേര് മുഴുവന്‍ കേള്‍ക്കുകയും ചെയ്തു.. ഇത്രെയും നാള്‍ അതിന്റെ ചുവട്ടില്‍ ചൊറി കുത്തി ഇരുന്നിട്ടും ഇങ്ങനെ ഒരു ഐഡിയ ഒരു അലവലാതിയുടെയും ബുദ്ധിയില്‍ ഉദിച്ചില്ലല്ലോ എന്ന ചിന്ത എന്നെ പുച്ചിച്ചു തള്ളി..

ചിറ്റപ്പനും മാങ്ങയും അടിച്ചു കൊരങ്ങായിക്കഴിഞ്ഞിരുന്നു ..

എന്നെ വിളിച്ചു അവിടെ നിര്‍ത്തിയിട്ടുള്ള കാര്യം പോലും മറന്നു വീണു കിടക്കുന്ന കോട്ടമാങ്ങയും ചിറ്റപ്പനും ഓര്‍മകളില്‍ മുഴുകി ചിരിയും ബഹളവും ഒച്ചപ്പാടും..

ഞാനോ ? ഗാഥ തുണി മാറുന്നത് കണ്ടിട്ട് ഇറങ്ങി നടക്കുന്ന വന്ദനത്തിലെ ലാലേട്ടന്‍ മാതിരി ഞാന്‍ അവിടുന്ന്നു തിരിഞ്ഞു നടന്നു !

അന്ന് ആല്‍ച്ചുവട്ടില്‍ നിശബ്ദരായിരിക്കുന്ന ഞങ്ങളെക്കണ്ട് അമ്പലത്തില്‍ വന്നവര്‍ വാ പൊളിച്ചു.. ഇവന്മാര്‍ക്കിതെന്തു പറ്റി എന്ന ഭാവമായിരുന്നു എല്ലാവര്ക്കും.. എന്തോ ഉടായിപ്പ് പ്ലാന്‍ ചെയ്യുകയാണ് എന്ന് വരെ ചില തല്‍പ്പരകക്ഷികള്‍ അടക്കം പറഞ്ഞു.. ഞങ്ങള്‍ പക്ഷെ കടുത്ത ചിന്തയിലായിരുന്നു.. ഓള്‍ഡ്‌ ജെനറേഷന്‍ ഞങ്ങളെക്കാള്‍ കിടിലങ്ങളായിരുന്നു എന്ന ചിന്ത ഞങ്ങളുടെ ഇന്ഫീരിയോരിട്ടി കോംപ്ലെക്സ് ഡബിളാക്കി.. എല്ലാവരുടേം നോട്ടം പൂട്ടിയിട്ടിരുന്ന ഊട്ടുപുരയിലായി..

ഊട്ടുപുര - പണ്ടുകാലത്ത് നാട്ടിലെ എല്ലാവര്ക്കും ഭക്ഷണം കൊടുത്തിരുന്ന സ്ഥലമാണ്.. ഇടയ്ക്കെപ്പോഴോ യക്ഷിയുടെ ആവാസകേന്ദ്രമായെന്നു പോലും.. അന്ന് പൂട്ടിയതാണ്.. ദ്രവിച്ചു തുടങ്ങി.. ഇത് വരെ ആരും തുറന്നിട്ടില്ലാ എന്നാണു കഥ...

ഊവ്വാ .. ചിറ്റപ്പനും സംഘവും അതിലായിരുന്നു കുടികിടപ്പ്..അത് നാട്ടുകാര്‍ക്ക് അറിയില്ലല്ലോ !!

ഞങ്ങളും തീരുമാനിച്ചു.. അതിനുള്ളില്‍ കയറിപ്പറ്റണം.. അതാവുമ്പോള്‍ ആരും അങ്ങോട്ട് വരികയുമില്ല.. കുളക്കടവ് വൃത്തിയായി കാണുകയും ചെയ്യാം ..

കൂട്ടത്തില്‍ ഏറ്റവും അലമ്പനായ ഞാന്‍ തന്നെ പ്ലാന്‍ വരച്ചു.. എന്നെക്കാള്‍ അലമ്പനായ സുകുവാണ് പിന്നെയുള്ള ബുദ്ധി സ്രോതസ്സ്.. അതിലും അലമ്പനായ സുനിക്ക് ഒരു സംശയം . അല്ലാ... ഇനി അതിനുള്ളില്‍ ശെരിക്കും യക്ഷി ഉണ്ടാവുമോ ?

ഒരു നല്ല കാര്യത്തിനു ഇറങ്ങുമ്പോള്‍ ഇമ്മാതിരി ഉടക്ക് പറയല്ലെടെയ് എന്ന ഭാവത്തില്‍ ഞങ്ങള്‍ ലവനെ നോക്കി സഹതപിച്ചു.. ഇത് കേട്ട് താറാവ് എന്ന സജി കൂടുതല്‍ സജീവമായി.. അവന്റെ കോണ്ട്രിബ്യൂഷന്‍ - " വട കാണിച്ചു നില്‍ക്കുന്ന യക്ഷിയാണ് വടയക്ഷി എന്ന് എന്റെ അമ്മാവന്‍ പറയുന്നത് കേട്ടിട്ടുണ്ട് " എന്ത് ഓര്‍ത്തിട്ടാണോ എന്തോ .. അവന്റെ കണ്ണുകള്‍ തിളങ്ങുന്നു !

ബെസ്റ്റ് കണ്ണാ .... ഇവനാണ് യഥാര്‍ത്ഥ പോരാളി.. ആത്മവിശ്വാസവും ആര്‍ത്തിയും തുളുമ്പി നില്‍ക്കുന്ന അവന്റെ മുഖത്തേക്ക് ഞങ്ങള്‍ ആരാധനയോടെ നോക്കി.. ലവന്റെ അമ്മാവനും എന്റെ ചിറ്റപ്പനും മുട്ടന്‍ കൂട്ടുകാര്‍ ആണല്ലോ എന്ന കാര്യവും ഓര്‍ത്തു !!

ഒടുവില്‍ പ്ലാന്‍ റെഡി ആയി.. ഓപറേഷന്‍ ഊട്ടുപുര !

[അല്ലാ.. തുടരണോ ? ?]